藝人陳家樂捱足7年終賺得人生「第一桶金」！早前拍戲意外受傷險半身不遂的家樂，大難不死，必有後福，「跌」出個運來，近來工作量急增，事業漸見曙光！

賺得「第一桶金」的家樂難掩喜悅之情，成晚笑到四萬咁口。

家樂前晚豪花5位數，宴請經理人公司同事齊齊食海鮮慶功。

落手揀海鮮時，家樂顯得雞手鴨腳，狀甚驚青！

大難不死，必有後福！早前拍戲意外受傷的陳家樂，近日成為圈中搶手貨，成功賺得人生第一個100萬！

陳家樂八月初於台灣拍攝林超賢新片《破風》時，由單車摔下受傷，醫生指他差少許便傷及中樞神經，隨時有機會變成半身不遂，但他復原力驚人，不但大難不死，更「跌」出個運來！

感激經理人陪伴

據悉，最近他成為廣告及電影界新寵，代言品牌主動要求加續廣告合約，更有內地片約向他招手，下月他將隻身遠赴甘肅逗留三個月拍戲。排山倒海的工作量讓家樂初嘗「甜頭」，賺到人生「第一桶金」。

家樂前晚相約經理人公司同事往西貢食海鮮慶功，全程表現興奮，豪花5位數宴客。席間他感性地答謝經理人Angelina及Wini：「好記得受傷後，Angelina特登飛過嚟台灣陪我，手術後睜開眼睛見到佢，令我即刻有番安全感。我入行七年真係未搵過咁多錢，依家決定將入息交畀Angelina幫我去投資。」笑指台灣是福地的他，揚言只要賺到1,000萬，便會請大家到當地旅行及「食餐好嘅」。

下周將出發往上海續拍《破》片的家樂再接獲好消息，原來林導打算加重他的戲份，讓他出發前好好準備：「有啲緊張，但一定會盡力做到最好。」