苗僑偉(三哥)以代言人身份出席室內高爾夫球場宣傳活動,撐場的曾志偉見到懷有兩個多月身孕的周家蔚時,即笑問她「生得未」,又說:「呢胎梗係生女啦!」家蔚因胎兒未足三個月而未能正式公布喜訊,志偉的一番話令她哭笑不得:「遲啲講啦!(呢胎想生女?)一直都係咁諗,追個女可以做管家婆!」

洪天明全程傍住懷有兩個多月身孕的家蔚,與戚美珍合照時亦寸步不離,名副其實係緊張大師!

擔任代言人的三哥即席揮桿,大獻身手。

此外,提到無綫熱爆劇《使徒行者》將開拍電影版,《使》劇主角三哥表示一切等公司安排,笑稱自己亦有興趣:「《使》劇收視屬近期較滿意作品,好多朋友關心我嘅真正身份,如果公司唔開,自己都會開!(為迎合內地市場,唔拍得『黑警』題材?)呢個係創作問題,先要搞好劇本再諗!」志偉得悉《使》劇開拍電影版後大感興奮,自言適合演「臥底」:「呢套劇最大特色就係唔到最後,都唔知邊個係臥底!(想參演?)希望啦!呢啲角色最啱我!」