歌手鄧穎芝求學時因陪同學而誤打誤撞加入籃球隊，雖然身形矮小，但走籃、剷籃樣樣掂，連中距離及三分射籃命中率亦極高，技術拍得住職業籃球員，但她謙稱體力不及當年，加上近月密密返內地工作，令打波時間少之又少，惟熱愛運動的她大讚打籃球可減壓及練氣助唱歌。

Vangie誤打誤撞加入籃球隊，自此便愛上打籃球。

Vangie靠打籃球減壓及練氣幫助唱歌。

經常在球場上受傷的Vangie，現懂得好好保護腳。

Vangie透過打籃球增加自信，可惜「嚇退」不少異性。

Step 1
籃球、波泵、波針及護膝
「打籃球最方便，帶嘅嘢比較少，有時我只係帶個波同支水就落街。」

Step 2
熱身，由頭開始做到落腳
「千祈唔好睇小熱身，拉筋好重要，如果唔係好易受傷，尤其腳同手指，手指要放鬆Fing吓，令『篤魚蛋』機會減少。」

Step 3
拍波及跑圈
「做完熱身就跑番三、四個圈，之後就要攞個手感，可以講要同個波產生感情。」

Step 4
射波
「好多人都有個錯覺，一有波喺手就射，其實攞完手感就由近（同個籃）開始射，射順咗先遠射，包括罰球。」

Step 5
走籃
「打籃球最基本就係走籃，初時會好唔慣兩步半，當識咗之後就會覺得打快攻時，以走籃得分係最高命中率。」

鄧穎芝（Vangie）以一身潮Look現身球場，穿上購自美國的波衫，落場不久後便開始喘氣，Vangie解釋因近月頻頻到內地登台兼錄影歌唱比賽節目：「今日天氣非常熱，攞番籃球上手好陌生，都有一段時間冇打籃球。」她透露中一開始打籃球：「其實接觸籃球都幾得意，本身冇諗住打籃球，因為陪同學去選校隊，自己選埋一份點知入咗，本身我係鍾意打排球多啲，參加咗排球校隊，朋友死都要我陪佢，所以放棄咗排球隊。」

受傷史多籮籮

問到籃球是否帶給她很多樂趣？Vangie說：「打籃球識到好多唔同朋友，尤其打街場可以同唔同對手打，入咗娛樂圈都有好多朋友打籃球，都可以幫到練氣同減壓。」打波難免會受傷，Vangie笑言受傷史超多：「都係兩個腳，試過有年新年臨放假，扭親左腳都照返學，點知連右腳都扭埋，行唔到要坐輪椅。」

球場上增自信

Vangie承認在籃球場上增加不少自信，她說：「女仔打籃球唔多，好多人會覺得識打籃球嘅女仔已經好勁，好彩由細打到大有根底，啲人會覺得你好勁，我就覺得都幾叻。」由於打籃球予人「男仔頭」感覺，問到會否擔心嚇怕追求者？Vangie說：「會呀！同我打波嘅人都係兄弟，本身性格好粗魯同男仔頭，其實都幾啱我。」並自爆打街場時大家都當她是男仔：「都有男仔有風度，見我剷籃都會讓開。（有冇被撩？）冇，大多數都係同熟朋友打。」