《東網電視》最新一集《娛樂onShow》邀得李蕙敏做訪問，入行多年的她在新歌MV中全裸上陣，可惜有苦自知，為遮掩敏感部位以致手抽筋！

多以短髮Look示人的Amanda，自爆專輯封面的長髮是「裝」出來的。

Amanda挑戰性感尺度，赤裸拍攝新歌MV。

Amanda（右）與主持李文珊分享製作新碟的趣事。

歌手李蕙敏（Amanda）日前接受《東網》《娛樂onShow》主持李文珊（Sherman）的訪問，暢談製作新碟及搞笑事！入行以來出碟甚多的Amanda，每張專輯封面都各有特色，但原來全靠「裝假狗」，她說：「大家睇到有短髮又有長髮，咩髮型都有，但係基本上所有長髮都係假，有戴假髮亦有駁髮。」

親力親為回饋歌迷

她又坦言專輯《橫濱別戀》是她的「飛佛」，皆因全是她落手落腳設計：「嗰時我想整到好似時裝書嘅樣，隻碟有A4 Size咁大，好似一本雜誌，入面有好多唔同造型。」

見解獨特的Amanda今次推出精選碟同樣出橋又出力，她更講解封套的設計：「以新曲加精選回饋歌迷，唱片封套就用大頭照，其實我比較鍾意用大頭相，等大家一睇隻碟就認得出係我！」提到新歌《銷魂》寄意埋葬過去的自己，不但意義深遠，MV的尺度亦相當突破：「我又冇咩性感底線，因為我又唔係影好多性感嘢，都係想表達首歌嘅意思。MV啲赤裸場面係表達拋開世俗，回歸自我。」她又透露拍攝時，雙手為遮掩重要部位而搞到手抽筋！