無綫劇集《以和為貴》演員徐子珊、馬德鐘、張名雅及朱千雪等，昨日在將軍澳電視城為劇集拜神。劇中飾演調解員的子珊笑言沒想過會有連場打戲：「之前同『小三』張名雅拍打戲，要質佢個頭，自己都整到膝頭損晒，又要用高踭鞋扑馬德鐘，整到佢隻手瘀晒，之後仲有場同朱千雪大打出手嘅戲，套劇好多誇張搞笑打戲。」問到子珊現實中碰上「小三」會否大打出手，她說：「唔會，現實中我好鵪鶉，男人有第二個，爭嚟都冇用。」提到陳敏之到峇里結婚，子珊說：「啱啱聽到呢個消息，佢哋好似拍咗拖十年，可能想保留私隱，遲啲補番結婚禮物畀佢。」而劇中飾演「小三」的張名雅透露角色「十三點」，但也容易掌握：「之前同子珊拍咗場打戲，要畀佢扯甩假髮，仲畀佢彈Bra帶。」

徐子珊笑言在劇中要用高踭鞋扑馬德鐘的手。

朱千雪（左起）、黃心穎及張名雅三位前港姐結伴出席拜神儀式。

而馬德鐘則與徐子珊由歡喜冤家到英雄救美擦出愛火，但還未知道有沒有咀戲：「對上一次同子珊拍咀戲反而係古裝劇《洪武三十二》，嗰陣仲黐晒鬚添。」