今年是羅文（籮記）的70歲冥壽，紀念騷《不朽傳奇．舞台上的羅文演唱會》將於12月19日在灣仔會展舉行。

張麗芳為圓父親心願，成立新公司後即舉辦羅文紀念騷。

籮記徒弟容祖兒及鄭伊健等獲邀出席，第一個答應的祖兒說：「無論邊日搞，我一定會度期唱，我會返去摷吓同師傅嘅合唱畫面或錄音帶，到時帶去同大家分享，我仲未諗到唱乜歌，我希望個騷係畀大家開心嘅感覺。」

據知紀念騷是已故「演唱會之父」張耀榮的遺願，他生前與籮記的助手曾提出搞紀念騷，可惜他突然逝世，其二房女兒張麗芳決繼承父業。

由於耀榮娛樂被法庭頒下清盤令，張麗芳剛成立新公司「永耀娛樂」，寓意永遠懷念父親，並主辦籮記的紀念騷打響頭炮，她說：「我永遠係佢女兒，佢真係好鍾意呢行，同歌手好似朋友咁，我知佢心願未了，我會沿用佢教我嘅方法，繼續幫爹哋做佢想做嘅騷。」