薛家燕向翠如BB挑機

薛家燕、蕭正楠（Edwin）及湯盈盈等，昨日出席無綫賀歲劇《倩女失魂》開鏡拜神儀式，家燕姐宣布演出聶小倩一角：「起初接到要演《倩》，我仲諗演邊個嘅阿媽呢？點知係我做小倩喎，故事講我死時得16歲，結果我一直以為自己仲係16歲，喺蕭正楠演嘅寧采臣面前成個少女咁！」

開動少女Mode

家燕姐笑言角色似為她度身訂造：「好啱我做，因為我心態都係少女，我見到蕭正楠都想咀佢呀！可能我哋會有緋聞添，因為我鍾意後生仔！（唔怕黃翠如呷醋？）我都想認識翠如BB，如果我吸引到年輕後生仔，或者佢都應該嚟跟我學吓嘢啦！」問到如何跟男友交代時，她說：「咪等佢畀啲心機囉，有啲危機感。（想佢激情啲？）唔係激情，係甜蜜！」

Edwin亦放風指恨與家燕姐演感情戲：「劇中我同吳若希一對。（有親熱戲？）劇本未出唔知，但古裝都好難好親熱，或者木桶沖涼，但我想同家燕姐演囉！（怕同吳若希親熱，要向翠如備案？）唔使，做嘢啫，大家明白。佢呢輪開緊綜藝節目《我係小廚神》，我拍完呢套劇又會開新劇。（女友冇劇開？）未輪到合適劇種啫！」

湯盈盈心繫愛女

飾演女版燕赤霞的湯盈盈坦言不捨得減少湊女時間：「唔捨得個女！（錢嘉樂幫手湊？）佢都就嚟開戲，我已經幫個女報多一日Playgroup，好在爹哋、媽咪返咗嚟香港幫手湊，依家至發覺媽媽好！」並自爆頂撞媽咪的往事，如今終明白媽咪苦心：「依家講得最多嘅係：『Thank you, Mom！』佢話等我個女大個咗，就知做人媽咪嘅味道！」