女歌手林欣彤（Mag）前晚出席活動與學生分享夢想，提到好友鄧紫棋（G.E.M.）有機會上太空，Mag坦言羨慕，認為對方可應付太空人訓練，並會託對方將自己的頭髮留在太空！

林欣彤羨慕G.E.M.能到太空一遊，還希望對方帶埋她出「髮」呢！

林欣彤邊唱邊落台與Fans握手。

林欣彤與學生齊齊玩自拍，十分Nice！

林欣彤前晚穿短裙仔到海洋公園出席活動，與學生打成一片，她獻唱時親切地落台與Fans握手及自拍。提到活動主題有關理想，Mag回想當年勇敢參加《超級巨聲》，勉勵年輕人勇於實現夢想：「我都係有同輩鼓勵，自己又豁出去，一步一步到依家先做到歌手，個個人都有自己光芒！」

提到另一巨肺歌手鄧紫棋（G.E.M.）有機會漫遊太空6分鐘，Mag坦言相當羨慕：「佢好勁呀！我諗人人都想踏出地球外，我由細到大睇咁多太空科幻片，都想試吓！我估G.E.M.係鐵肺，又成日運動，太空人訓練應該難佢唔倒！（有咩想託佢做？）剪條頭髮畀佢，叫佢喺太空揚出去，當自己都去咗。」她表示除了想「上天」亦想「下海」：「想潛水潛到好深，想喺海底種棵草、摸吓珊瑚。（搞海底婚禮？）婚禮又唔想咁辛苦，水底好難靚喎！」

畀曱甴嚇到彈起

提到將推出新碟，Mag表示歌曲主題圍繞「情感」，唱片相片有多個不同感覺的造型：「最鍾意係開心Look，可以不停食嘢、跳繩，最難係性感，畀架車我，要我喺車外挨挨吓。（點表現性感？）我都唔知！要靠攝影師喇！條裙好難行又要着高踭鞋，影影吓突然有曱甴添！嚇到我跳起！」