Janice Man（JM）與Angelababy曾經情同姊妹孖住吸金，如今卻各行各路，她終承認二人決裂全因年少無知，被媒體報道造成心病！經過十年洗禮，不再介意被比較的JM雖然走得較慢，但她卻領略到娛樂圈這個萬花筒的遊戲規則，認清目標的她決定從此急起直追！　

娛樂圈的「新陳代謝」速度驚人，「慢步」5年的JM已蓄勢待發，準備展示隱藏多時的實力。

Angelababy（右）在生日會吻賀壽星女JM的畫面已成歷史，難以重現。

JM（左）與Angelababy的友誼不知不覺間變質，不禁令人慨嘆「為何舊知己在最後變不到老友」？

以孖公仔形象走紅的JM與Angelababy（右），如今事業發展各有千秋。

成立個人Workshop的JM，今後凡事將親力親為，將青春投資在事業上。

「也許豐收月份尚未到你也得接受」，JM這5年內在黎明的保護下鍛煉出驚人EQ。

轉投太陽娛樂的JM，將與「金牌經理人」黃柏高攜手大展拳腳。

入行十年的Janice Man（JM）最近轉投新公司太陽娛樂，並成立個人Workshop，以固定班底打理一切事務，外間看來她似乎比以往變得更加積極，但她強調一直以來都是野心勃勃：「我野心係好大，我諗呢面未必個個睇到！可能大家未必知道我性格係屬於好事業型定愛情至上，同我傾完偈先知我係好有諗法嘅人！」

默默耕耘十年收成

她亦開始掌握遊戲規則：「我係比較低調，唔鍾意話晒畀人聽我做緊咩，我諗住默默去做啲人總會知，做乜咩都要揭開肚皮畀人睇啫！但發現原來唔係好Work，我開始明白呢個遊戲唔係咁玩，希望依家開始會Keep到個質，但同時提高個量。」

昔日姊妹今日對手

出道至今，JM經常被外界拿來與同期出道的Angelababy比較，她坦言曾非常傷心：「以前初入行唔識Handle咪會好唔開心，其實係一個事實嚟喎！冇辦法，既然傳媒覺得有娛樂性，有新聞價值，都係會問。」十年前，她倆不時孖公仔出席活動，現時卻恍如陌路人，事業上則各自打拚。JM將分飛燕的原因歸咎於新聞報道：「傳媒嘅影響力對我哋嚟講係好大，唔係介意比較，但好多嘢某啲傳媒會扭曲，因為個新聞點喺邊就會扭咗去嗰邊，解釋一次、兩次、三次後，一段正常友誼點都會有傷害。」

幸好二人現時已看開：「當時大家仲細，唔識點諗，睇唔開，以前我會介懷點解要將我哋兩個去比呢？好攰，咁樣對我哋好唔Fair，依家我哋當然已經好睇得開！」

「黎明」時分步往未來

正所謂「最大的敵人是自己」，JM加入黎明（Leon）公司5年，與初出道時的頻繁工作量有顯著分別，但她卻沒有後悔：「之前係好踏實、慢走嘅5年，亦無悔，我覺得好值得，學到好多嘢，相比細個嘅我咩都唔識，乜都盲舂舂咁，又唔知死，又講錯嘢，我長大咗好多！」

回想起以往當模特兒的日子，她坦言工作量非常大：「公司嗰時係好Harsh（嚴苛），咩都做，好多曝光見報率，到Leon呢度係好求質素，相對個量係少啲，啲人可能對我印象好模糊，但係我覺得佢哋出發點係保護我，同為我去諗！」「慢步」5年，JM堅信當時的努力奠定了今後的基石：「我好尊重，我選擇得就會相信佢哋，我覺得呢5年係慢慢打好基礎，要經過咁紮實基礎先有依家嘅我，到依家經過十年洗禮，係時候做啲新嘗試！」