「女神」陳妍希早前拍《神鵰俠侶》被網民揶揄「最肥小龍女」,一度情緒低落,近日成功減磅的她回復自信,更揚言要在花都(目及)仔!

減肥成功的陳妍希自信心十足,即時Model上身Chok住擺甫士!

即將結婚的黃伊汶與丁子高齊齊現身巴黎睇騷。

陳妍希、黃伊汶及丁子高現身巴黎,於本周二出席GROUND-ZERO 2015春夏時裝騷,明顯清減不少的陳妍希自信地騷美腿,問到是否瘦番,她說:「依家OK,但仲想瘦多少少!」並指正在內地拍攝《秦時明月》:「與陸毅合作,飾演野蠻又有神經質而瘋狂嘅女仔!」

認與柯震東聯絡

問到抵達巴黎後,會否抽空Shopping及觀光?她說:「我有把握機會影相。(有冇睇靚仔?)有!其實唔只男生靚,好多女生都靚,穿衣都好Fashionable。(唔喺當地搵個浪漫男生?)時間太短!」並承認有跟柯震東短訊聯絡:「我哋係朋友,係關心佢。(你話佢係大笨蛋?)我冇嬲佢,只係擔心佢。(佢唔拍戲感到可惜?)我唔覺得佢會唔拍戲,只係仲需要時間!」

丁子高準備「走數」

將於下月結婚的黃伊汶透露正忙於籌備婚禮:「我第一次結婚,乜都唔識,下次會識多啲,哈哈!」並大爆暫冇意「造人」:「唔急,唔想咁快有住,後年先!」下月將在峇里舉行婚禮的她踢爆原定做姊妹的谷祖琳有機會「走數」:「本來有谷祖琳,但佢十一月生,我話咪到時生,我都唔知邊度搵醫院幫佢。」丁子高則表示看時裝騷之餘,還會到酒莊參觀,問到會否買手信給太太楊千嬅及囝囝?他說:「老婆已經畀咗成張List我,又手袋又衫,我拒絕咗!」