日本綜藝節目《TORE》遊戲款式多多，深得嘉賓喜愛經常作客玩餐飽，而近日推出的特別版更邀得尊尼男星村上信五和人氣索模中村杏扮成大熱吉祥物褲甩時，眾星出盡法寶大鬥法！

以金字塔尋寶為主題的遊戲節目《TORE》播出的特別篇邀得千葉縣非官方吉祥物褲甩時（Funasshi）任「客席主持」向各位嘉賓委派任務，出場即獲歡呼的褲甩時相當得戚，而尊尼組合關西Johnny8（關8）成員村上信五就與索模中村杏齊齊Crossover成褲甩時上陣大放笑彈。村上玩問答遊戲信心十足，雖然在第一關時兩位諧星拍檔已率先「陣亡」，不過無阻他獨自答對其餘問題，可惜最後因不夠時間失敗而回。至於人氣女模中村杏亦棄靚樣換上騎呢褲甩時Look登場，不過亦因答問題拖延時間而被跣落谷底，雖然玩遊戲實力欠奉，但其後換番靚衫繼續玩的中村杏就熱褲上陣大騷招牌長腿補鑊，搶盡風頭！s