陳嘉寶吼中60萬靚車

形象青春健康的陳嘉寶一直深受廣告商歡迎，今年初應邀接拍無綫劇《女人俱樂部》後，飾演「少女版李若彤」的她成功「彈起」並頻頻出席活動，過去半年便接拍了7個服裝、收身產品及電子產品等廣告，加上接下的30個商演，保守估計吸金逾300萬，難怪家住將軍澳屋邨的她早前透露有意置業。

興奮睇完又試

本報記者日前在尖沙咀Audi分行發現穿背心短褲的Anjaylia，見她對其中一部價值60多萬的吉普車情有獨鍾，一名男經紀在其身旁講解汽車性能。Anjaylia火速開車門跳上司機位試車，並細看車廂設備及調校倒後鏡，又打開車尾箱睇足半粒鐘，期間不時咬手指及嘟嘴，似是向經紀施冧功爭取折扣。

唔靠男友資助

眼利的她當發現記者後即帶同經理人離去，步出車行時甚為愕然，問到是否有意買車？她說：「呢排工作忙要周圍去，需要一部車代步。（有冇心水？）睇中部60幾萬嘅，因為駕駛經驗唔夠，經理人叫我咪買太貴。原本預咗買樓，但依家買車迫切啲！」問到會否叫金融才俊男友黃頌祈資助？她即豪氣地說：「唔會，我又唔係賺唔到、儲唔到！」

身為好姊妹的蔡穎恩得知Anjaylia買車後，大讚她向來是慳妹兼理財有道：「佢係慳妹，如果放工唔趕時間都係搭港鐵，儲到錢買車都唔出奇！（覺得佢突然富貴？）唔覺，唔出奇。（佢有富貴男友？）以我所知佢哋經濟獨立，大家咪淨係睇表面啦！」