李玟昨日出席癌症基金活動時自爆奶奶是乳癌康復者，老爺近年患上膀胱癌第四期，為多花時間照顧及作為丈夫Bruce的精神支柱，她寧願推掉工作，為家庭放棄金錢。

李玟擔任粉紅大使，呼籲姊妹們關注乳癌。

李玟推掉工作，支持老公Bruce（圖）照顧老爺。

靚女歌手李玟（CoCo）昨日以粉紅大使身份，出席《癌症基金會粉紅革命啟動禮》。她透露身邊不少年輕朋友患上乳癌，而奶奶亦是乳癌康復者，故此她對乳房檢查十分重視：「我會定期做檢查，女士最好一年做兩次檢查，而我每日沖涼都會自己Check吓。」

全家團結 冇計損失

提到家人患病，CoCo又透露老爺近年患上膀胱癌第四期，她無奈地說：「有啲膀胱癌係可以醫到，有啲係醫唔到，佢就係醫唔到嗰種。老爺有一段時間身體麻麻，所以我都推咗好多工作，原本我會做《中國夢之聲》新一輯嘅導師，但都冇做，因為老公需要我喺佢身邊支持，老爺一個月要做三次化療都好辛苦。（你老公Bruce心情點？）佢經常打電話畀老爺，我哋一有時間就會去探老爺，佢哋全家都好團結，我希望可以有多啲時間照顧佢。（損失幾多錢？）冇咁計！我依家會花多咗時間做慈善。我覺得自己好好運，所以想做多啲有意義嘅事。」

擔心祖名 Call過成龍

提到契細佬房祖名仍被拘留，CoCo坦言屬私人事件，不欲多談，但強調十分關心對方：「我當然關心佢，亦好擔心佢！我會支持佢，我有同大哥（成龍）聯絡過。（佢係咪好煩？）我唔講呢個喇！多謝大家關心。」