馬德鐘、李思捷及翟威廉等昨日於數碼港拍攝無綫劇集《以和為貴》的示威戲份，威廉以磚頭打碎車窗，令思捷被「爆玻璃」！而馬德鐘談及黃秋生鬧罷拍風波一事時，叮囑藝人要談好條件才接工作。

Joe出力谷「紋身」手臂，變身彪形大漢！

威廉（右）與趙永洪追討工錢，更七情上面！

翟威廉

「反骨律師」思捷西裝骨骨，Chok出奸樣！

馬德鐘（Joe）、李思捷、翟威廉及潘志文等昨日拍攝新劇的示威戲份，即場為手臂紋身「補色」的Joe，自爆為拍劇而捱夜：「過番啲瞓得三個鐘嘅日子。（身體應付到？）捱咗兩、三日就喉嚨痛。」談到黃秋生日前與無綫新劇《梟雄》鬧出罷拍風波，曾與對方合作的Joe稱要事先談好細節：「好多嘢拍之前要傾好，例如住咩酒店同坐咩車。除非答應咗有，但最後冇，咁就要嘈，之前要傾清楚去保障自己！」他又自爆將到內地「掘金」，拍攝民初劇集。

遭警員反手「制服」

而劇中飾演地盤工人的威廉與近百位臨時演員圍堵思捷及志文乘坐的房車，七情上面的威廉在衝撞期間憤而拋擲磚頭及打碎車窗，令車內的思捷慘被迎面「爆玻璃」！最後要由擔任調解員的Joe到場調停，而威廉更被警員以武力押上警車，他透露拍攝時被現役警員出手制服：「我同佢哋講可以『真做』，當真咁制服一個發癲嘅人，點知佢哋一屈我隻手，我就話都係借位好啲！」

而思捷則自認「反骨仔」律師，更險被翟威廉掟磚所傷：「佢用磚頭掟爆架車嘅玻璃，再用玻璃碎擦過我塊面。（危險？）做晒安全措施，有黑布接住啲玻璃膠粒！」