新一屆港姐又誕生，雖然三位港姐當選後，即要面對負面新聞，不過仍很有信心及堅強。三料冠軍邵珮詩在公眾面前大方露「疤」，坦言要露得有勇氣。而亞軍王卓淇指當選後有壓力，但會做好港姐呢份工。季軍何艷娟作風低調，表示參選後克服了不少困難。至於「民選冠軍」吳凱欣則表示對娛樂圈甚有興趣，但會否入行仍是未知之數。

選美落幕，吳凱欣（左起）、何艷娟、邵珮詩及王卓琪由勁敵變好友。

邵珮詩表示不會接受除「疤」手術。

邵珮詩參選時無懼露出胸部的「疤」痕（紅圈）。（資料圖片）

王卓淇自認是叻女，毋須媽咪擔心。

何艷娟表示參選後變得更有勇氣。

大熱倒灶的吳凱欣感謝媽媽的支持。

新一屆香港小姐在「爆冷」下順利誕生，冠軍是邵珮詩、亞軍是王卓淇及季軍何艷娟，惟三人異口同聲不覺是「爆冷」，而是勝在比賽當晚表現夠淡定。三料冠軍邵珮詩，雖然貴為維他奶後人，但強調並非靠背景，當晚她狀態大勇，更在公眾面前大方露「疤」，她坦言要露得有勇氣，更不會做手術「除疤」：「好坦白講呢個疤，要有好大嘅勇氣，以前係未公開過，同埋我做乜都出自我內心。選得都預咗會畀人知，我已經跳出呢個框框。（唔開心？）唔會，如果畀人睇到我係一個好堅強嘅女仔，少少嘅疤唔係問題，18歲嗰陣都有唔開心，因為女仔都注重自己樣貌，都要慢慢接受自己。（做手術？）暫時唔會搞咁多嘢，睇吓有咩新嘅科技，因為係遺傳，唔知有咩反效果。」

亞軍王卓淇做好呢份工

至於亞軍王卓淇則有嗰句講嗰句，給人一種寸嘴感覺，要學識收斂的她，自言當選後感到有壓力：「因為我哋係香港小姐，係一個榜樣，唔可以Hea出街，我真係好鍾意着拖鞋出街，但依家真係唔敢啦！」問到家人會否擔心她入行？她笑言自己是叻女，亦會做好港姐呢份工：「媽咪都唔會擔心我入行，我叻女嚟嘛，喺外國生活冇問題，由唔識煮嘢變成廚藝高手。之前未做過嘢，港姐係第一份工，比賽問答30秒都講『假如港姐係一份工，我哋會點見工。』我就話我好鍾意照顧人同動物，呢個就係我自己。（你照顧佢哋兩個？）反而係邵珮詩照顧我哋，有大姐姐嘅感覺。」

季軍何艷娟低調勇敢

修讀法律的季軍何艷娟無論在賽前及賽後都相當低調，故她表示可能外界認為她「爆冷」：「可能我比較低調，所以大家覺得我冇咩新聞，就覺得好爆冷，其實唔係，評判見過我哋好多次。」而她坦言參選後了解自己更多，並克服了不少困難，她說：「我了解咗自己好多，克服咗好多困難，依家答問題淡定好多，我覺得自己贏在夠淡定，口才都唔錯。（轉變？）有勇氣咗，勇於挑戰自己去做唔同嘅嘢。」

民選冠軍吳凱欣輸在唔夠放

身為「民選冠軍」兼旅遊小姐得主的吳凱欣，選前雖然被視為大熱門，但最終落敗，她坦言是太緊張而令自己失準：「有觀眾嘅時候我就緊張起嚟，因為問題係唔一樣，唔知有處境題，我承認我認真咗，唔夠放。」雖然吳凱欣失掉后冠，不過仍得到家庭的支持，她說：「返到屋企見到媽媽布置好晒屋企，諗住同我補祝生日，我見到成屋都係波波同蛋糕，當時我真係喊到死晒。」她又表示正考慮是否入行拍劇，因對娛樂圈十分有興趣，但卻心大心細，未有定案。

後記：忘帶「士啤」鞋

每次做訪問，藝人定必會有兩手準備，會帶多對鞋或衫，以防萬一。不過四位港姐入行資歷尚淺，其中更有一位沒有帶高跟鞋替換，其經理人即媽媽上身表示已苦口婆心多次叮囑她們，可惜沒有人理會，四位港姐即小朋友上身，表示以後不會犯錯，並會聽教聽話。