上位女星文凱玲（Connie）昨日自爆，信用卡戶口被盜用大半個月，疑是黑客入侵，利用其網上戶口玩啤牌遊戲，簽帳逾一萬元！飛來橫禍的Connie表示銀行正調查事件，而她已即時Cut卡。

Connie被黑客入侵戶口碌咗萬幾蚊，今次真係笑唔出！

Connie拍住阿澤密密開戲，搵埋唔少都冇咁傷。

港姐出身的文凱玲近期獲導演王晶力捧，在電影《唐伯虎之衝上雲霄》及《賭城風雲2》中佔很重戲份，但事業暢旺的她昨日在網上自爆「黑仔事件」：「收到銀行的查詢，才發現信用卡從月頭開始在網上被盜用了四十多次，最近比較忙，沒有用信用卡，所以也沒特意去查看帳戶！」並上載了一張木無表情的自拍照，可見其心情無奈又失落。

碌足四十次

昨日Connie接受電話訪問時透露，收到銀行的通知後大感詫異，相信是黑客透過Facebook盜用其網上信用卡資料，並用來玩啤牌遊戲，期間過數四十多次共逾一萬元，她說：「但係好奇怪，簽咗超過一萬蚊，但又退番八千幾蚊，唔知係咪因為佢玩Game贏咗？不過我依家Cut咗信用卡、轉咗網上戶口密碼，亦都Send咗Report畀Facebook希望佢哋跟進！銀行中心查緊件事，我未知使唔使畀錢，如果要畀就大約二千幾蚊。（報警？）未決定，暫時等銀行處理吓先。」

Connie表示向來謹慎，對於何以洩漏信用卡資料感迷惘，亦害怕下次會有更大損失：「我一向只會用自己嘅電腦同手機登入信用卡戶口，出國都冇登入，可能係以前開過Online Shop，實際原因我唔肯定，唔知幾時畀人Hack咗，防不勝防。」