鍾嘉欣和伍允龍緋聞傳足七年，二人雖然有默契地齊聲否認戀情，但昨日《好報》報道二人拍拖再度斷正，雙雙出席朋友飯局舉杯同飲。嘉欣昨日到電台宣傳時，依然表明堅拒公開戀情，誓保「單身」身份。

鍾嘉欣到電台宣傳劇集《大藥坊》。

《好報》直擊伍允龍情不自禁出手掃鍾嘉欣背脊，換來嘉欣一「睥」。

雖然早已是圈中默認的一對，但鍾嘉欣與伍允龍多年來貫徹地下情發展。日前《好報》獨家拍得二人孖住出席朋友聚會，傾得興起時伍允龍「犯禁」伸手搭女友膊頭又掃背，此舉卻觸動嘉欣的敏感神經，不慣人前晒恩愛的她即「恕睥」男友，嚇得男友乖乖縮手坐定定。

昨日嘉欣到電台宣傳熱播劇《大藥坊》時，沒有否認與伍允龍孖咇現身朋友飯局一事，又指「怒睥」只是相片角度問題：「嗰晚朋友生日，朋友先係主角，當晚只有開心嘅成分，冇怒睥成分。」至於當晚前後腳走，嘉欣直言：「費事傳媒亂寫。」又強調：「暫時都唔會公開戀情住。」

關係好互相扶持

提到當晚同場的王君馨與陳法拉舊愛薛世恒雞啄唔斷，嘉欣為好友解畫：「嗰晚好開心，大家都係基督徒，密密傾好正常，呢行太多壓力，大家可以互相扶持係好好，同埋好想講一個正確嘅訊息，其實男女都係可以做朋友，真係會有兄弟姊妹。」問嘉欣是否擔心緋聞影響奪視后機會？她笑說：「冇所謂，如果以感情生活揀視后，心態就錯啦！」她透露下月將推出新劇《飛虎II》，屆時觀眾能夠看到完全不同的她。