引起全球哄動的智能手機iPhone 6昨日在本港開售，不少明星成為特選客户，大美人林青霞昨晨八時已率先獲贈手機，成為全港最快有機的「果迷」之一，令人羨慕不已！

周汶錡（圖）、袁詠儀及林青霞有幸成為首批iPhone 6用家，拎上手大晒特晒！

收到iPhone 6的阿Bob肉緊到當眾錫機！

周麗淇傍實方力申出席活動，獲贈新iPhone！

令一眾「果迷」引頸以待的iPhone 6及iPhone 6 Plus昨日在3香港首日開售，不但吸引大批巿民排隊搶購，更掀起炒賣潮，不少明星亦趨之若鶩！有幸成為首批用家的明星急不及待在網上晒新機，作風一向低調的大美人林青霞更成為全港最快到手的用家之一，著名公關鄭紹康於昨晨八時將青霞取電話的相片放上微博，只見戴黑超的青霞對新機愛不釋手，熱捧「土豪金」的她更即時試打電話及自拍！而另一位影后級人馬袁詠儀亦是首批開機的VIP。

琦琦全家「落訂」

此外，名模琦琦、馬詩慧、周汶錡、周麗淇（Niki）、梁漢文及方力申等昨日出席開售活動，並即場獲贈新機，對於成為首批用家，琦琦雖然即將飛往上海出席代言活動，但仍抽空前來領取新機：「第一日擁有好開心，知道好多人排通宵，好知足！（電訊公司送？）係佢送，我係呢間電訊公司多年用戶，黑白之前都有，所以今次揀銀色！」並指已為丈夫任達華及女兒訂購：「方便溝通，可以同時一齊傾電話。（幫囡囡留倩影？）好鍾意幫佢影，但佢唔鍾意影相。」

Niki揀手機似擇偶

問到Niki會否與男友徐正曦用「情侶機」時，她說：「手機得一部，可以分享一齊用，但我諗佢有訂！」並指不會用作炒賣：「我好鍾意教主Steve Jobs，一個改變世界嘅設計師，唔贊成炒！（同選擇男朋友一樣？）唔睇靚仔同表面，好似手機咁，耐用就得，靚仔睇得多都厭，唔係靠樣就得。」

而G.E.M.、楊愛瑾、林盛斌（Bob）、黎淑賢、應昌佑及王友良等昨日亦紛紛在微博晒新手機！