陳茵媺再佗「豪B」：有咗三個半月
43歲的陳豪認真是好腰好腎好男人！去年12月和陳茵媺一索得男後，未夠一年又成功造人，再度有喜！向來貪靚的Aimee，大膽地以四吋高踭鞋出席活動並自爆再佗「豪B」的喜訊，話明一早計劃兩年抱兩外，更揚言B照佗、工照開！
懷孕三個半月的茵媺穿上鬆身裙，凸顯孕味！
陳豪話咁快就嚟再做老竇，當然開心！（資料圖片）
兩個大肚婆茵媺（左）及梁詠琪特別啱傾。
講起有喜及老公陳豪，茵媺昂高頭大笑！
去年12月4日為老公陳豪誕下金叵羅陳梓燁（Aiden Joshua）的陳茵媺（Aimee），昨日出席《Mikimoto x Hello Kitty高級珠寶展開幕酒會》時宣布再有喜，自爆懷胎三個半月。大仔現時九個月大，他們即再成功造人，足見陳豪有心有力！有指早前陳豪想綁實老婆繼續生，而Aimee雖然心思思想復出，但仍以家庭為重辭演重頭劇《張保仔》，明顯思想傳統的陳豪認為有仔趁嫩生，故一早計劃生多個！
老公鍾意做多仔公
懷第二胎的Aimee昨晚不改貪靚本色，腳踏四吋高踭鞋配Tube Dress「封胸」晒肩，助手傍實免受推撞，上台時見她小心翼翼：「有咗三個半月，仔女未知，心情好興奮！一直想小朋友之間嘅年齡Close啲，係Plan咗。（想生仔定女？）冇所謂，細佬可以同大仔做啲男仔啲嘅嘢，細妹嘅話，大仔要做大哥哥照顧妹妹！（兩個夠晒數？）再諗，做媽媽好辛苦！之前抱BB抱到隻手發炎，未完全康復，不過依家有經驗，唔擔心。」
Aimee全力湊仔兼養胎，問到老公豈不要更努力搵奶粉錢，一提起老公即甜絲絲的她說：「老公好努力，我都好努力！我會繼續出Event，自己鍾意演戲！坐喺屋企唔係我嘅性格！依家要做咗人生大事先，之後先做番嘢。（陳豪係咪唔想你工作？）不嬲佢都好支持我做嘢，不過家庭同工作要平衡！」她大讚陳豪依然Fit爆：「仍然咁型！Perfect in my eye！（在我眼中是完美的！）（在活動上公布喜訊，酬勞係咪特別多？）唔係睇錢嘅，都係開心Share啫！」要照顧大仔的Aimee自言比上次懷孕辛苦，間中有嘔，加上要照顧一大一細，比平日特別攰外，更稱已告知大仔喜訊：「佢都係九個月大，不過佢都叫咗三次『媽媽』，唔知係咪叫緊我。」她於公布喜訊前一晚明顯緊張，在微博透露瞓唔到覺。
而陳豪接受電話訪問時不停傻笑，流露再當爸爸的喜悅 ，他表示會加倍愛護太太：「興奮加興奮！第2胎有咗經驗，做爸爸都放鬆啲！」記者以「多仔公」稱呼他時，他興奮地說：「我好鍾意呢個名，係上天委派畀我啲任務！（出鬼主意綁住太太？）冇鬼主意，我係嘅傳統人，生到點解唔生呢？但依一次係我哋預計之內，係天賜嘅禮物 。（茵媺有團火想復出拍劇？）我絕對支持佢拍劇，依個係佢夢想。」
梁詠琪有咗重六磅
與茵媺同場的歌手梁詠琪亦宣布懷孕三個半月，重了六磅的她肚凸凸，未知懷的是仔還是女，但指老公希望生女，笑言聞到老公煮飯便會嘔吐不停：「同屋企隻狗講咗佢將會有『細佬妹』。」
