影帝梁朝偉及樂壇天后王菲昨晚出席密宗祈願晚會，歷史性合唱《心經》的二人大晒靚聲，現場三千密宗信眾以燈海配合。已休息一年的偉仔揚言放假放到悶，心郁郁想盡快開工！
王菲與梁朝偉在三千密宗信眾的燈海下，進行世紀合唱。
一向寡言的王菲未有在台上發言。
臨時未能到場的嘉玲踢爆偉仔為獻唱勁緊張。
梁朝偉及王菲等多位紅星昨晚到九展出席《愛的六字真言》祈願點燈晚會，偉仔及王菲破天荒在台上合唱《心經》，大會表示消息傳出後，三千張門票火速搶購一空。
身穿黑色西裝的偉仔開騷前接受訪問，精神奕奕的他笑言為獻唱而大為緊張，事前更特地跟張學友操曲，問到學友教了甚麼「秘技」？偉仔說：「都係啲基本招數啦！對上一次表演已經係梅艷芳紀念演唱會，好耐喇！都緊張！（信咗密宗幾耐？）好多年，大約係拍《赤壁》時開始。（受嘉玲影響？）都係，佢擺好多佛學書喺屋企，我揭揭吓都覺得有興趣，去過印度拜見大寶法王。（幫手宣揚密宗？）唔介意，都想做啲有意義嘅事，信奉後心境平靜咗、開朗咗。」
嘉玲爆偉仔緊張到爆
提到已放假逾一年，他笑言開始感到悶，並透露約在11月復工，問到是否拍王家衛新片《擺渡人》？他說：「應該係，但我冇咩『返工』，唔知變數。（拍戲咪冇得滑雪？）希望都抽到幾日玩啦！（同老婆劉嘉玲演舞台劇？）幾好玩，但排練要好長時間。」開騷時，大會播放偉仔及嘉玲念「唵嘛呢叭彌吽」的片段後，偉仔及王菲壓軸出場合唱，全場點燃明燈配合，王菲以一貫靚聲完美演繹，而偉仔亦唱得有板有眼，不過一向寡言的他倆卻不發一言。
因事未有捧偉仔場的嘉玲昨晚在電話中踢爆老公相當緊張：「不過佢話晒都係歌星嚟！佢緊張，因為咩都想做到最好。（前一晚點慶祝中秋？）我要做舞台劇，返到屋企都11、12點，循例有賞月食月餅。」完騷後，王菲即乘坐七人車返回荃灣的豪宅寓所，期間更用其他車輛阻截記者追訪。
此外，每次來港均愛掃貨的王菲前日被網友發現她在銅鑼灣的一間童裝店，專注地揀選童裝，明顯是為幼女李嫣選購。自從為前夫李亞鵬的電影唱主題曲後，王菲近日再開金口與老拍檔林夕合作，為電影《觸不可及》唱主題曲《愛不可及》，好友趙薇及張亞東等 在微博讚好及留言：「終於開嗓了！」王菲亦忍不住打趣回覆：「湊個熱鬧，嘿嘿！」
影視組
