薛凱琪坑住唱閃現變幻球

前晚薛凱琪（Fiona）舉行紅館演唱會，達九成半入座率，以「飛機場」身材見稱的她打出漂亮「變幻球」，以閃鑽Bra打底，罕見谷出事業線！全晚換足七套靚衫的Fiona大晒長腿，更因眼淺成大喊包喊足全晚，前後六次感觸落淚，惟她仍不時大講爛Gag，又喊又笑！

唱《想你》悼偶像

Fiona除與女舞蹈員跳辣身熱舞打觔斗外，更大唱偶像張國榮歌曲《想你》，並模仿對方造型扭腰、趷籮及自摸！她獻唱成名作《奇洛李維斯回信》前說：「一個歌手去唱咩歌，都會斷定到佢係咩人，自從有咗呢首歌之後，我好想大家相信呢個世界乜嘢都有可能。」

隨後再分享她與男歌迷的奇妙回憶，指該男歌迷曾透過同事與她接觸：「有日我約咗佢出嚟傾咗一個鐘頭偈，之後對方傳短訊畀我，話我畀到力量佢。其實佢都畀緊力量我，令我覺得工作賺到錢、有少少名氣，都可以幫到人，記住係有希望！」最後連Encore唱足33首歌超時完成！

騷後回復「長平」身材的Fiona在後台受訪時，被記者取笑不見了事業線。談及紅館騷，她坦言很感動：「頭先導演同監製都係話Encore唔Encore好，上兩年我冇Encore，啲歌迷係咁揼地。」並笑言超時罰款應由公司埋單。對於被笑是大喊十，Fiona自爆綵排時已喊甩眼睫毛：「我感性嘛！」

短訊慰問祖名

提到演唱會中不少歌迷都大叫她做「方大同老婆」或「方太」，她笑說：「知道大家想為我未來着想同有Happy Story。（同方大同有冇呢個可能？）我答有，可能佢睇完報紙會好開心，我答冇，可能佢又會唔開心。」但強調現時未有與對方拍拖，對方亦未有追求。至於被指個唱門票要割價平售，Fiona說：「知道啲飛賣得幾好，我自己都有買。」

對於另一位緋聞男友房祖名未能捧場，Fiona說：「想請佢嚟睇，身為祖名好好朋友，一定想佢嚟睇。（慰問對方？）私人慰問同自己Send短訊嘅內容都唔會講，尊重公司同今晚係我入行十周年演唱會，第日先再答。我都想畀回應大家交功課。」

而昨日凌晨，Fiona在微博上載個唱相：「今天實在是太完美了，而我也明白今晚的成績是需要你們所有的愛。謝謝你們讓我感動萬分。」