趙勁皓因推出寫真集而吸納不少粉絲，本身是酒吧老闆的他打算學習花式調酒，殺出新血路，更與女友盧頌之（DaDa）拍住上變身Bartender表演花式。DaDa近期學會調製酒吧大熱的Rainbow Shot，並分享調製秘訣。

King和女友DaDa都熱衷調酒，DaDa更不時去男友的酒吧捧場。

DaDa顯身手調製Rainbow Shot，好靚呀！

Behind Back Into Tin

Spin Tin

Crossover Pour

Around The World

Tennis Crab Pour

早前推出寫真集的趙勁皓（King）「四肢發達」，但頭腦絕不簡單，事關他既開健身室，又做餐廳及酒吧老闆，瓣數多多。不過原來他以前曾任職調酒師，要調出Cocktail可謂易如反掌：「我以前喺尖沙咀做過Bartender，所以一般喺餐牌上嘅Cocktail我都識調，例如Long Island嗰啲，但就未學過花式。」至於曾拍電影《爆3俏嬌娃》的King女友盧頌之（DaDa）平日則愛與三五知己把酒談歡：「因為King本身開酒吧，所以平時約朋友都會去佢嗰度飲，貪佢有多啲唔同種類嘅酒，同埋方便啲。」

「夫唱婦隨」學花式

愛好杯中物的DaDa透露最近學識調酒吧大熱的Rainbow Shot，一種如七色彩虹的玩味Cocktail，她更即席教路：「整Rainbow Shot最緊要係注意糖分比重，要由最甜嘅開始落起。首先落紅糖水，之後加冰粒，再放橙汁，然後加入White Spirit同藍糖水，最後用隔冰器一氣呵成咁倒落Shooter杯就完成。」至於對調酒早有認識的King反而想挑戰玩花式，更孖住女友向Flair Iron的女花式調酒師Che請教。

甚有諗頭的King更打算學成後在酒吧表演開拓客源：「頭先仲問埋價錢打算報名學吓，當係一門手藝。好多酒吧都係得DJ打碟，好似冇邊度會有Artist駐場表演花式拋樽，相信可以殺出條血路。」DaDa則笑言會「夫唱婦隨」，為男友打氣並在旁執樽：「雖然我都覺得自己有天分，但啲酒樽對女仔嚟講好重，頭先我練習嗰陣已經跌咗好多次。」

口味一致愛烈酒

負責指導King及DaDa的Che亦大讚兩人天分高：「King嘅理解能力比較高，但個人比較急，啱啱學識一樣就想學下一樣。而DaDa就好敢試又唔怕受傷。」已拍拖大半年的二人連口味都一樣，異口同聲表示最愛飲Whisky（威士忌），King說：「出去應酬成日接觸到唔同種類嘅Whisky，飲得多就開始覺得好飲。」DaDa說：「我唔係好飲紅酒，因為每次飲完都會嘔，通常都會加冰飲Whisky同Macallan。」雖然兩人同樣愛飲烈酒，但King卻爆料指女友每次都會飲醉，被踢爆的DaDa更分享醉酒後的趣事：「試過有次飲醉咗，返到屋企就瞓咗喺廁所，點知畀媽咪發現，我即刻扮清醒話沖緊涼。」

冧住Shake

趙勁皓及盧頌之雖然首次學花式，但天分甚高的二人亦表演得有板有眼，更大顯身手各自示範兩款花式及一款雙人花式，盡顯情侶之間默契。