本報獨家踢爆周秀娜舊愛陳偉成(Avis)因呷錯醋而與女友尹蓁晞(Yumi)鬧分手!Yumi回港後態度堅決,又難抵Avis「騷擾」而要封鎖他,看來Avis今次跪玻璃都冇用!

堅決分手的Yumi昨日提起Avis竟然「嗌報警」,好大仇口咁喎!

Yumi嬲爆回港,Avis則癡癡「接機」及目送對方離開。

箍煲「失敗」的Avis事後與好友到公園吐苦水。

昨凌晨12時,Yumi於馬國工作後回港,「男友」Avis則於1小時前現身機場準備箍煲,期間鬼祟躲在一角不停打電話。Yumi甫見到大批記者即一臉愕然,她指落機後Avis不斷致電她,有指Yumi早已領取行李,但知道Avis在外面而擾攘一小時才步出抵港大堂。提到Avis亦在場想箍煲,她即嬲爆說:「如果有心氹我唔需要叫記者!」她表示兩人已分手數天,原因是想法不一,強調沒有小三,更不明為何Avis未了解實情便將其韓籍朋友的相片放上Instagram。問到是否冇彎轉?她直言想分手及冷笑說:「哈!叫佢返屋企,離開呢度啦!」兩人最終沒有碰面!

認衰仔跪玻璃

Avis見Yumi急急腳走時並沒有上前阻止,只說:「我目送佢安全就得,唔想搞大件事!」問到知不知錯甚麼時,他心灰地說:「長期做錯嘢,一出世就不停做錯嘢!」提到Yumi斥他通知記者到場,Avis激動地說:「你哋知係咪我叫你哋嚟!我發誓冇Call記者!或者我不嬲都似係會咁做嘅人!」其後又認衰仔話會跪玻璃認錯!Yumi離開機場後直接回家,更勞氣指不想跟男方有任何接觸。至於Avis回到九龍灣後約了幾個兄弟到公園劈酒,飲到雙眼通紅。記者提議他扭耳仔認錯拍照氹Yumi時,他眼濕濕拒絕:「費事咁做作,畀佢以為咩都係我搞出嚟!」

旅行「孤寒」AA制

據知Yumi不滿有人去旅行要「AA制」,屋租又要兩份,連一包紙巾都計,更認為有人借自己宣傳!Yumi昨日出席電視節目記者會時指心情已平復,自爆兩個月前已想分手,對方更騷擾到其朋友及想封鎖他,更指若Avis有進一步行動會報警處理,明顯劃清界線!此外,Avis昨日亦被舊愛蕊蕊抽水,她於微博暗示男方不會放過每次上鏡機會,更好識利用人。