無綫男神馬國明（馬明）被最新一期《好報》踢爆戀上年紀相差14載、來自上海兼貌似「千億新抱」徐子淇的寰宇小花徐佳琦，徐佳琦經理人於戀情曝光後大讚馬明孝順、唔蒲及形象好，為兩人發展大開綠燈。

男神馬明與小花Jackie無懼年齡差距，燃起愛火！

馬國明

馬明與Jackie深宵約會斷正即不知所措，雙雙避望鏡頭。

《好報》又有料爆喇！馬明原來已名草有主！

最新一期《好報》踢爆有圈中筍盤之稱的40歲馬國明，於兩個多月前在朋友聚會中結識來自上海及擁C Cup身材的26歲寰宇小花徐佳琦（Jackie），縱使年紀相差一大截，二人卻一撻即着，打得火熱！

本月7日凌晨，馬明被發現接載Jackie出現尖沙咀，至17日兩人再度約會，當晚馬明與女友同遊後載她返回尖沙咀寓所，抵埗後記者即上前拍照，同車斷正的馬明和Jackie不約而同地表現愕然，馬明更一時手指指，一時「天然呆」，騰晒雞打手勢着記者別再影，更一度踩油圖撇甩記者，於尖沙咀、何文田及旺角遊花園，最後過海到大坑，撇記者不果的他最終鼓起勇氣落車。

馬明下車後扮鎮定除眼鏡狂抹，直認兩人經朋友介紹認識並正在了解中，揚言只出過兩次街，問到有否發展空間時，他即口窒說：「你哋依家嚇親佢，真係唔知喇！（公開咗好啲？）你哋嚇到佢咁，佢頭先真係好驚，你哋突然閃出嚟，真係嚇親佢！」其後急急送女友回家。

徐佳琦嚇到病

戀情曝光後，Jackie經理人大讚馬明孝順又唔蒲，形象正面：「佳琦都係好女仔，機會一定有，男未婚，女未嫁。」她透露Jackie於車廂斷正後嚇到病倒，問到Jackie是否住劏房時，她說：「佢由上海來港，自力更生，冇大家講到咁慘，都有好多工作！」