香港新進導演孔令政的新片《第七謊言》，本月中在香港舉行了兩場放映會，反應熱烈，不少觀眾在座談會上踴躍發問，令孔導及演員之一的姜皓文喜出望外。

眼見座談會上的影迷踴躍發問，孔令政喜出望外。

孔令政的新片獲大批觀眾支持，為他打了一支強心針。

姜皓文坦言與孔導合作愉快。

對於新片放映會大受歡迎，導演孔令政（James）坦言放下心頭大石：「套戲之前喺外國放映，等咗咁耐終於可以返嚟香港放映，雖然外國觀眾好鍾意戲中美國式嘅電影語言風格，但我好緊張，擔心香港觀眾接受唔到，第一場放映可能係首映禮性質，早段觀眾反應都比較靜同拘謹，但入到戲肉反應好好，尤其啲黑色幽默位令全場爆笑，我都放心番！第二場改喺藝術中心放映，反應更好，可能觀眾都熱愛電影，更加有心機鑽研我想表達嘅嘢，本來都擔心完場後啲觀眾會走晒，但最終發現唔單止冇走，仲問咗好多問題，我都好意外！」

孔導又坦言觀眾的提問甚有水準：「套戲其實好有港式風味，但手法可能會令香港觀眾覺得比較新，唔同一般睇開嘅港產片，有觀眾問我：『點解用咁多長鏡頭？』又對戲中地道嘅廣東話嘅黑色幽默素材表現得好投入，座談會傾咗個幾鐘，好感謝佢哋咁熱烈嘅支持，希望到正式上映時（約11月）都繼續有咁好嘅反應！」

姜皓文合作有得着

提到與新進導演的合作感受，姜皓文說：「James同演員嘅溝通特別徹底，令角色可以更加立體，同新進導演合作，可以喺演出上發掘到更多嘢！不過今次喺公廁拍咗三、四日，真係從影以嚟未試過咁恐懼！」