焦媛及高皓正闊別六年再合演音樂劇，焦媛坦言婚後的高皓正多了一份男人味，更擔心與高皓正在台上攬攬錫錫會令其太太不滿。

闊別六年再合作的焦媛及高皓正，在舞台劇中更有默契。

焦媛毫不避嫌與高皓正在鏡頭前咀嘴，唔通真係唔怕對方老婆呷醋？

焦媛及高皓正六年前的舞台劇演出，至今仍令人印象深刻。

舞台劇演員焦媛及高皓正再合作，於下月重演由王嘉翊執導的音樂劇《野玫瑰之戀》，二人繼2008年後再度合作，焦媛坦言是一種緣分：「其實係有個場地主辦方話好鍾意《野》劇，要求我哋重做，我梗係話好啦！」而高皓正亦坦言感到興奮：「如果上年搵我做都未必得，因為我太太大肚要照顧佢，依家時間啱啱好，大仔兩歲半，細仔七個幾月大，生活穩定咗，我可以放心去演。」焦媛又大讚高皓正有男人味：「六年前同佢合作過，佢之後再做一個舞台劇《大家樂》，我有去捧場睇佢演出，唔知係咪當時佢結咗婚，覺得佢好有男人味。」而高皓正則覺得六年後的焦媛對舞台劇演出依然專業及充滿熱誠。

激讚有男人味

由於《野》劇中二人有不少攬攬錫錫的親熱場面，問到焦媛會否對已婚的高皓正有所避忌，她說：「嘩！你唔講我都冇諗呢樣嘢！上得台演出我都當佢未結婚。死啦！你太太會唔會介意？你太太咁靚，舞台上同我合作會唔會投入唔到？」高皓正說：「我太太最介意我做得唔投入，佢完全唔介意，之前嗰次佢睇到我哋有親熱戲，佢同啲朋友喺台下興奮到叫咗出嚟！佢唔係咁易呷醋嘅女人，佢反而擔心會畀壓力我，仲叫我要做得放啲！」