張兆輝在新片《恐怖在線》中憑着精湛演出，在外地影展兩度獲封影帝，自小怕黑的輝哥更衝破心理障礙，一個人走入鬧鬼黑巷，令觀眾嚇破膽，連戲中飾演輝哥拍檔的蔡瀚億也頻頻喊驚！

張兆輝（左）與蔡瀚億拍住上「撞鬼」，惟有拍心口頂硬上！

張兆輝克服陰影拍鬼片，兩個獎抵你攞嘅！

張兆輝與蔡瀚億在《恐怖在線》中「驚」喜演出，輝哥更在聖地牙哥獨立電影節及Accolade Global Film Competition中榮最佳男主角，但戲中撞鬼也能保持鎮定的輝哥，現實中原來「鬼」正是其弱點！他說：「6、7歲時，我發夢見到好多着清朝官服嘅鬼喺墳墓爬出嚟行落山，我驚到扎醒，嚇到全身汗，自此怕黑，唔敢一個人行好黑嘅路！但後尾拍戲改善咗。」

撞邪毛管

輝哥重看戲份時仍然怕怕：「有場戲講我一個人走入好黑好黑嘅走廊，然後被鬼正面撞埋嚟，我睇戲嗰時都毛管戙。呢套戲我睇劇本時已覺得情節緊湊，唔係失驚無神嚇你一嚇嗰種鬼戲，而係透過熟悉嘅環境（公共屋邨）令觀眾產生似曾相識嘅幻想，咁先驚！」問到可有信心憑此片在香港再獲影帝，他謙稱：「未諗過，順其自然，正如呢兩個獎，我都冇諗過會攞到，做演員唔計較有冇獎，最重要係投入演出，享受過程。」

死頂喊驚

蔡瀚億則覺得又驚又有挑戰性，他說：「我係細膽又鍾意扮大膽嘅人，最鍾意同輝哥去屋邨查案嘅戲，我睇劇本嗰時已好驚，當音響加埋畫面，愈睇愈驚！好似行緊鬼屋，加上我個角色有啲古怪，演起嚟有挑戰性！我鍾意套戲主題帶出究竟真係有鬼定心中有鬼，唔係單純鬼片，觀眾可以思考！」