佘詩曼與林峯在無綫新劇《使徒行者》中縱橫黑白兩道，劇中身為臥底的阿佘為取得情報，潛入桑拿店做揼骨妹，拍攝時更應監製要求自度搞笑「長臂猿猴式」踩背法，奇招盡出！

「骨妹」阿佘自創各種方式「踩」客，睇見都牙煙！

阿佘劇中還會化身型爆鐵騎士。

沈震軒受傷過程曝光。

林峯（左）將與唯唯並肩劈友！

由佘詩曼、林峯及沈震軒等主演的《使徒行者》昨晚首播，本報率先披露今明兩晚的必睇位！阿佘在劇中化身「百變師妹」，身為臥底探員的她為查案不惜潛入桑拿店做「揼骨妹」，更要扮清潔阿姐及護士，她笑說：「除咗扮骨妹，仲有好多角色扮演，我個角色好樂天，為攞料可以不擇手段！」她更即興自創「長臂猿猴式」踩背法，親身上陣為男顧客按摩，香艷又搞笑！而監製文偉鴻大讚她落力：「阿佘施展渾身解數，各種揼骨技巧都出齊，直情猴子上身，好驚個景都拉冧！」為了埋蠱惑仔阿峯身，阿佘又擺丁字腳甫士放電，但她亦有型女一面，在劇中會騎電單車與警方追逐。

林峯晒「舞」功

早前沈震軒騎單車拍追逐戲時不幸變成「空中飛人」導致右手受傷，他說：「鑲咗螺絲唔用得力，拍打戲要就住。（有陰影？）依家拍《衝線》有踩單車戲，有啲驚，所以會小心啲，見到陳家樂嘅新聞都怯一怯，希望我哋個劇冇事。」而梁烈唯在劇中與林峯演蠱惑仔，怕事的他經常要林峯幫忙，不過唯唯大讚對方：「佢拍打戲真係好好睇，可能跳開舞身手靈活啲！」