高少華（阿銀）日前推出第三隻唱片，向一眾已故歌手致敬，歌頌他們為樂壇帶來的貢獻，而在多首翻唱歌曲中，她稱錄製梅艷芳的《抱緊眼前人》時最有感覺：「我本身同梅姐識得，佢係一個冇架子嘅藝人，有時工作完咗仲叫我哋同佢傾偈，過節嗰陣又會邀請我哋去Party，同佢工作好開心。佢死咗之後我試過喺夢度見到梅姐，我挨喺佢膊頭，嗰陣佢好靚咁着住白裙，成個夢好開心，到後來聽到新嘅編曲，覺得同個夢好Match，所以好快錄好！」她又憶述當年為梅姐生前最後一個演唱會擔任和音，看到她日漸消瘦亦十分痛心。

高少華自爆錄製梅艷芳的《抱緊眼前人》時特別感觸。

高少華再次推出新碟，並翻唱經典金曲向已故歌手致敬。

江若琳與高少華感情要好，更試過企街邊食臭豆腐。

企街邊食臭豆腐

阿銀的另一個身份是歌唱老師，在眾多學生中，她與江若琳（Elanne）感情最好，但她笑言彼此的第一印象甚差：「嗰陣佢啱啱出道搵我學唱歌，我覺得佢冇心機學，而佢又覺得我唔啱佢，所以學咗一堂就冇學。」但緣分相當奇妙，幾年後，Elanne再次找她學唱歌時一拍即合，更成為了好友：「佢係一個好乖同勤力嘅女仔，雖然佢冇再跟我學唱歌，但一直有Keep住聯絡，佢有心事都會搵我傾，我哋仲試過喺旺角街邊食臭豆腐。（唔怕畀人認得？）唔理啦！嗰陣開心就得！」