女模王璐瑤（LuLu）搞搞新意思，以代辦機票為副業，在微博聲稱可以超低的價錢購買機票：「頭等艙3折起，商務艙5-8折起，任何日子，任何地方來回，只要是國際的。」即有不少網友留言詢問。

昨日LuLu接受電話訪問，透露因有朋友在旅行社任職，故可取得平價機票：「我係指大部分機票係有折，唔係全部都有折。每張機票我抽佣一成，廉航當然冇得賺，係飛長途先有得賺。呢門生意啱啱開始兩日，暫時都有一單生意，我當係一個搵錢機會，好多圈中朋友包括仙樂都同黃榕都有打嚟問。」她保證所辦的機票都能成行：「唔係跟團Waiting List嗰類機票，係直接同航空公司訂。（如果機票有問題邊個負責？）當然係我朋友做嗰間旅行社負責啦！」