已為人母的楊千嬅昨日與古天樂（古仔）、吳耀漢及馮淬帆等在荃灣出席電影《五個小孩的校長》拜神儀式，現場五位小演員即席獻唱《小太陽》，氹得千嬅、古仔十分開心。古仔表示該片與《掃毒》屬同一班幕後，但今次人數是有史以來最多，幾乎一個副導湊一個細路。飾演校長的千嬅自爆戲外亦幫手照顧童星，更繼續扮演「衰人」，但遭童星笑她NG：「佢哋覺得我係校長，邊個唔記得對白，我就叫佢上樓梯企一分鐘，佢哋堅驚！不過佢哋都好乖、好醒目。」要湊五個小孩會否嚇怕？她說：「唔會，生咁多個好偉大。（追多個？）諗吓先，我呆晒！」她又為囝囝向美術組索電話，以便日後請教做勞作。古仔則自稱經常被小孩恰：「呢五個一見到我就嘻哈大笑。（恨生B？）係兩件事。（實習吓先？）親戚好多細路，實習咗好耐。」

小演員落力獻唱，獲古天樂哥哥獎勵食雪糕！

千嬅為湊小童不介意扮「衰人」。

大人切燒豬，小演員就與古仔及千嬅切蛋糕。