鄭嘉穎及陳展鵬前日為新劇拍攝持槍對峙戲，入魔的展鵬騎劫旅遊巴，更化上紅眼妝表現邪氣，兩人捱熱標汗持槍追逐，原本可以收工的林夏薇亦忍不住在場觀戰！

化上紅眼妝的展鵬挾持旅遊巴，殺氣騰騰。

鄭嘉穎

嘉穎與展鵬掹槍對峙，氣氛緊張。

在場偷師的林夏薇，被展鵬用槍指頭。

張頴康唔小心Chok親條頸。

視帝鄭嘉穎及陳展鵬等前日到屯門舊海水化淡廠拍攝無綫新劇《天眼》重頭戰，兩人持槍互罵，張力十足，入魔的展鵬化上紅眼妝表達角色失眠，並挾持旅遊巴一批人質，兩人在炎熱的天氣下追逐標晒汗，非常投入！正值休息時間的林夏薇被劇力吸引，換上便服在場偷師。合照時，展鵬與嘉穎即「變臉」變得輕鬆，展鵬更做出搞笑表情，扮持槍指着林夏薇。

劇接戲冇得抖

嘉穎表示劇集已近埋尾，下月初要拍攝另一套新戲，沒有時間休息，提到早前整傷腳，他表示大致無礙：「大部分動作戲都應付到，係跑步急停要好小心，最鍾意嘅網球都冇打喇！」對於同劇的楊怡被指花千萬買豪宅準備明年跟羅仲謙結婚，嘉穎笑言阿怡只透露過想投資：「不過我唔認為依家係買樓好時機。（聽過佢想結婚？）冇喎！咁佢一向都好開心嘅。（送禮？）真係請飲先啦！」而展鵬笑言買樓及結婚都是開心事，一樣值得恭喜：「不如祝福我先！我想早過佢結婚買樓，等中六合彩。」

林夏薇撐林峯決定

對於有傳林峯不續約無綫及另起爐灶，嘉穎認為這是其個人決定，問到會否覺得小生買少見少？他說：「時代不停轉緊，要畀機會後輩接班嘅，都唔好諗住我喺TVB拍到老吖！」至於林夏薇表示對堂兄林峯的動向不知情，但作為家人會全力支持。此外，劇中被展鵬追殺的張頴康不慎Chok親頸，他慨嘆做了父親後要更注重健康，而提起兩個月大的女兒即冧爆，表示多數由他負責湊女，辛苦但很開心。