歌手吳若希及藝人羅仲謙等昨日為無綫新劇試造型。穿緊身褲的謙仔下身激凸，而若希自認冧大隻男，但未敢與謙仔演親熱戲！

穿緊身褲、扮成單車選手的謙仔被封「現袋人」。

吳若希自爆鍾情肌肉男。

謙仔（左二）為演好新劇角色而狂練踩單車。

吳若希（Jinny)、羅仲謙及蔡思貝等昨日於電視城為無綫新劇《衝線》試造型。穿緊身褲、扮成單車選手的謙仔，因下身現形而被封「現袋人」。Jinny對此毫不尷尬，更冧爆直認鍾情大隻仔：「我鍾意運動型、心口厚同膊頭闊，好有安全感同有承擔。（拍劇乘機(目及)仔？）望吓都過癮，我鍾意睇男仔嘅線條！」但她笑稱冇膽與謙仔親熱：「同佢有感情線。（親熱戲？）我未夠膽！（知佢有女友？）唔係公開咗咩？」

狂踩單車整花腳

而謙仔對於激凸相當尷尬：「着呢種褲冇得着底褲，不過有塊好厚嘅墊。（僭建加強效果？）唔使，塊墊太厚！」首度擔正男主角的他指狂練踩單車而「整花腳」。另外，無綫於周一凌晨三時播放的德國對阿根廷世界盃冠軍戰收視報捷，平均及最高收視的收看百分比為100%，平均收視12點（約78萬觀眾收看），最高收視達16點（約104萬觀眾收看）。