今日推出寫真的「模特兒」，昨日先在寫真祭鬥出位！早前被《東網》直擊當街與盛品儒攬啜的Super Sexy Hero成員郭奕芯，得悉對方向前度箍煲兼「跪地」求饒後，即說：「男兒膝下有黃金！」

有傳盛品儒跪地送花冧舊愛，被Ashina出口術寸低招。

蕊蕊瞓身谷寫真，在活動上落力跳唱。

打扮性感的Amy狂揈皮鞭，SM味濃！

劉俐密實封胸，略欠睇頭。

仙樂都（左）即席咀爆到場支持的友人！

書展今日開鑼，o靚模寫真戰亦正式展開！二十多名「模特兒」昨出席《Bubble & Friends 2014寫真祭》活動，更以超性感造型博出位，吸引大批龍友捧場，當中話題「盛女」郭奕芯（Ashina）更是焦點！她與AD2成員Amy早前傳不和，台上卻有講有笑，更用皮鞭挑逗Amy！

Ashina早前被《東網》直擊夜會盛品儒，提到對方用盡方法向舊愛蔡一鳳箍煲，新招是送玫瑰和寫悔過書，更揚言會跪地求饒，問到可有聯絡？她說：「覺得冇乜必要聯絡。（佢送花，又話跪地？）男兒膝下有黃金，希望佢箍煲成功。（對送花有咩睇法？）諗諗啦！起碼換咗紮花先囉！（殘得滯？）我唔會鍾意囉！」

盛品儒多次提及有人是得益者，問到可有感到不快？她說：「有唔開心，但覺得就算佢咁講，每件事都有正、反兩面。依家情緒OK，覺得事實唔係咁樣，呢啲嘢佢知啦！」再提到對方將於動漫節舉行活動，她指若對方邀請亦會考慮。

劉俐預告送Under

至於遲大到的劉俐（藍莓）自言乘友人座駕時遇上車禍，記者指其打扮較密實，她說：「都好Sexy，性感唔一定露肉。」她又自爆若寫真銷量No.1，將為粉絲送上在寫真中穿過的內褲。蕊蕊受訪時則表示男友金剛原本想買50本寫真，但她限買10本，而金剛在網上留言力撐：「買了保證不後悔！」另外，現場兩名重口味o靚模舉止「突出」，Amy獲78歲契爺曾權威律師送贈泳衣，黃榕與朱主席則在無音樂伴奏下跳辣身舞，相當騎呢！