女子組合HotCha成員張紋嘉（Crystal），入行7年來竟與緋聞「零」接觸，現實生活桃花亦統統「曇花一現」，慘成「寡宿女」的Crystal，為打破宿命，絕不抗拒與圈內人拍拖。

慨嘆難搵好男人的Crystal，首選與圈中人拍拖，因大家互相了解工作情況。

相士指Crystal是遲婚的人，看來披嫁衣出閣要多等一段日子。

Crystal曾被拍得與粗眉男攬實過馬路，未知是否其「曇花一現」的戀情之一。

Crystal入行七年來食長「齋」，令她深感無奈！

曾對泡菜仔充滿憧憬的Crystal，曾穿韓服及到韓國遊覽。

Crystal自爆讀書時是「搶手貨」，男友一個接一個。

跳唱組合出身的Crystal，「跳得又睇得」，但入行至今竟未真正戀愛過，缺乏愛情滋潤的她足足Dry了7年，難怪叫慘：「真係唔知點解會冇，就算有都係好短暫，係曇花一現嗰種，都唔算係開始過，連畀我失戀嘅機會都冇。」莫非問題出自Crystal本身？她很無奈地說：「我有睇過相，好多都話我係『寡宿』，即係要遲婚，唔好太細個結婚，仲要最好同丈夫唔好成日見，即係最好佢經常唔喺香港，或者係移民分隔兩地做太空人最啱。」

Crystal沒想過會是寡宿女，自言讀書年代是「搶手貨」，男友一個接一個，但沒想到入了娛樂圈竟然「未開齋」拍拖，她有反思，發覺最大原因是她不能輕易投放一段感情：「我係一個唔可以識一個新朋友就拍拖發展嘅人，要識好耐時間，要做咗一、兩年朋友先。以前拍過五年拖嘅男朋友，都係識咗兩年先開始。（香港男仔邊有耐性同你做幾年朋友先拍拖？）就係囉！因為好細個父母已經唔係成日陪我，令我慣咗一個人，反而對人會冇乜安全感，要識好耐先得。」

Crystal慨嘆現今找個好男人不易，她又是藝人身份，外界只透過電視機畫面及一些報道來認識她，對其觀感與真實的她會有不同，加上工作不定時，圈外人是很難理解，所以首選是與圈中人拍拖，因工作情況可互相了解，不用多作解釋。

與韓仔撐枱腳具壓迫感

至於「曇花一現」之中不乏歌手和泡菜男，Crystal說：「嗰時我啱啱入行，同呢個Artist一齊時間好短，係性格問題冇發展到，我唔會講邊個嘅，佢依家都好少喺香港做嘢，亦唔知佢有冇拍拖啦！」

在韓風吹襲下，韓男已成香港女士的「夢想男神」，Crystal亦曾經對韓男充滿憧憬，被高大靚仔的他們所吸引，但一餐飯已嚇怕她：「試過同一名韓仔出嚟食飯，係食日式火鍋，我食塊肉佢都要我細細啖食。同埋佢哋習慣女仔去服侍佢哋，令我覺得食餐飯都好有壓迫感，未去到拍拖，只係朋友已經咁大男人，好難再相處落去啦！」她期待在踏入「3字頭」前，能再嘗被愛的滋味，希望真命天子快些出現，讓她能逃出「寡宿」命運。