劉心悠及吳家麗昨日現身尖沙咀為電影《盂蘭神功》謝票，心悠自爆要導演張家輝再操朱古力肌：「好想家輝都到場，但佢喺泰國開緊工！（點慶祝？）本身話去馬爾代夫，不過冇可能，叫佢再操六舊腹肌先！」並表示正苦練馬甲線：「教練話要半年先練到。（練六舊腹肌？）兩舊算喇！（練成着比堅尼晒身材？）唔會，着短衫就得，不經意嘅美感先係靚。（為拍寫真做準備？）有可能，不過會用健康方法去演繹！」

劉心悠（右）及吳家麗現身尖沙咀為《盂》片謝票。

而身穿「女鬼」裝的吳家麗想扮鬼嚇觀眾：「我反傳統着黑色長裙襯番套鬼戲！」並自爆曾向家輝投訴：「好想有鬼上身戲份，我仲同家輝投訴我哋冇對手戲！」同為導演的她大爆想做女版希治閣：「我喺自己嘅電影會去得好盡！我鍾意驚慄懸疑故事，好似之前執導嘅《花街柳巷》咁！」