高Ling根風撐美斯捧盃做球王
世界盃決賽如箭在弦，明日凌晨三時德國決戰阿根廷，全球球迷屏息以待！《東方報業集團》昨日在尖沙咀及銅鑼灣派發世盃海報，吸引大批市民踴躍索取。派海報的高海寧、龔嘉欣和張名雅等都是世盃球迷，而且壁壘分明，以四比四各撐德國及阿根廷奪冠！
高海寧睇好阿根廷捧盃，更盛讚美斯爆發力驚人，做球王話咁易。
黃心穎（左起）、陳智燊、龔嘉欣和張名雅在尖沙咀鬧市派海報，場面墟冚！
小朋友反應十分踴躍，攞到海報後更興奮大叫！
穿短褲大騷美腿的龔嘉欣，自言是德國隊的專一球迷。
昨午約一時，無綫藝人黃心穎、陳智燊、張名雅及龔嘉欣到尖沙咀海旁，出席《東方報業集團》世界盃派海報大行動，吸引逾百市民圍觀及索取海報。雖然烈日當空，但小朋友表現踴躍，當獲得海報時開心得即席細閱，現場市民的興奮表情足見海報大受歡迎。到昨午四時，藝人高海寧、葉翠翠、周志文及周志康於銅鑼灣派發海報，反應同樣熱烈。
對於明日凌晨三時德國決戰阿根廷，眾星早有心水！身為西班牙球迷的高海寧（高Ling）力撐阿根廷，冀望成就美斯球王之路：「上場睇阿根廷對荷蘭，佢哋打得非常好，好搏命，係冠軍之路！但呢場係硬仗，希望阿根廷守得住，等到12碼時決勝負，就算天光都要睇落去！」雖有指阿根廷淨係踢一個美斯，高Ling說：「美斯成日畀兩、三個人或者成班人圍住可能係好事，等其他人有多啲機會。以美斯嘅爆發力，只要有一次機會走甩，就可以入一球搞掂！」她大讚海報精美，已為細佬及身在巴西的Keyman（足球評述員馬啟仁）預留一份。
黃心穎與陳智燊（Jason）分別力撐德國及阿根廷，心穎說：「睇好德國隊捧盃，上一場打贏巴西好落力，上半場入足五球仲以為睇重播鏡頭！」Jason說：「我支持阿根廷，美斯可以一個打十個！」他又取笑心穎支持德國因為德國球員靚仔，心穎即反駁：「德國隊邊有靚仔！全隊實力雄厚！」Jason說：「美斯都好勁！」心穎BB窒他：「得美斯一個勁！德國係全隊都勁呀！」
張名雅為男神平反
而張名雅力撐阿根廷：「好鍾意美斯，佢好勁！」並為「男神」美斯被指「Hea踢」平反：「比賽時間咁長，上半場谷咗，下半場未必保持咁谷住，要喺緊張時刻先發力，同埋足球係講Teamwork！（曾指美斯高大靚仔？）佢球技好勁，而且佢高過我，事實係高大靚仔！」又指海報上美斯面旁印上世界盃獎盃，猶有「暗示」，希望阿根廷贏2：0。龔嘉欣則支持德國隊：「好鍾意張海報一邊德國，一邊阿根廷，壁壘分明，我估德國贏2：0！」另外，葉翠翠雖大讚德國，卻睇好阿根廷：「德國表現好出色，呼聲高。但我好鍾意美斯，雖然德國好強，但情感上支持阿根廷贏1：0，矛盾都冇法！」周志文、周志康均力捧德國：「睇高德國一線，上場贏巴西7：1好犀利！德國球員比較高大，反觀阿根廷休息時間短啲，德國會贏。」又指美斯雖然好犀利，但相信德國隊會有「專人」緊盯。八位星級球迷撐德國或阿根廷者均4：4，未到決賽齋論支持者已勢均力敵，明日世紀大戰，自然不容錯過！
