緋聞男女陳庭欣和翟威廉分別出席世界盃活動，夾定口供互稱好朋友，翟威廉更讚足四次，指Toby是「好好好好朋友」，又表示會約她到沙灘玩。

大讚翟威廉是「好好好朋友」的陳庭欣化身「情場殺手」出席活動。

翟威廉與陳庭欣隔空互冧，看來感情好得不得了！

翟威廉和陳庭欣被拍得行街約會，因而傳出緋聞。

陳庭欣（左起）、何傲兒、張景淳和羅孝勇出席活動時表示恨收生日驚喜。

無綫藝人陳庭欣（Toby）前晚出席《2014 FIFA巴西世界盃之全城興奮大派對》活動，將為世盃決賽擔任直播司儀的她表示會做定功課，睇足四強賽事！雖然下月生日當天要開工，但她自爆恨收生日驚喜，更希望由她經營的日本餐廳生意興隆。談到男友方面，她表示隨緣，又指翟威廉是「好好好朋友」，與對方見面也不尷尬！

傳緋聞係好事

另一方面，翟威廉昨日與陳嘉佳（小寶）出席荃灣世界盃活動，曬得一身古銅色的他自爆是為了在夏天晒肌：「一星期做兩次Gym，又會全男班去曬太陽！」問到緋聞女友Toby指他為「好好好朋友」，他即詐型：「得三個（好）咁少？咁佢係我嘅『好好好好朋友』囉！（冇停過傳緋聞？）由佢傳，係好事。（傳到變真？）唔知，睇機緣。（夏天搵佢去沙灘玩？）有機會就搵！（佢下月生日恨收驚喜？）我份人冇咩驚喜，人到已經係禮物！」

小寶則預告會於無綫節目中與鄭欣宜扮組合Twins，大放笑彈。談到日前煞科的無綫劇集《老表，你好hea！》，她自爆劇中會與林盛斌（Bob）咀足七次。