無綫小花黃翠如昨日到屯門為文憑試考生打氣,當年會考奪得1A5B的她,獲封「星級高材生」!她自爆讀書時只懂溫Past Paper,又試過先斬後奏去Camp,結果被爸爸漏夜接走!

黃翠如(左)與新鴻基地產代理助理總經理(租務)孫雅茵齊齊出席活動。

黃翠如(中)手持打氣棒為DSE考生打氣。

黃翠如昨日與新鴻基地產代理助理總經理(租務)孫雅茵到屯門出席《V city DSE放榜齊Say Yes》活動,替文憑試考生打氣,翠如說:「我會考成績1A5B,記得放榜前,我同班同學喺屋企樓下等天光!(點解唔返屋企?)屋企冇咁大地方,又唔想嘈住屋企人。我不停溫Past Paper,錯過好多學生生活。(錯過埋男仔約會?)約會?好難!記得以前團契去Camp,夜晚食完糖水,同爹哋通咗個電話,佢即刻嚟接走我。(你冇講低?)冇,去Camp嗰班都係一齊成長嘅朋友,爹哋嚟接係因為我嗰時喺佢間公司做暑期工,佢認為我第二朝返工會遲到,所以嚟接我!」

提到早前拍檔洪永城指「黃翠如拍拖係我嘅傷心事」,她說:「佢真係生抽王(抽水王)!佢最想我有拖拍,咁佢就可以同啲女仔講佢唔係同我一齊!(你介紹女仔畀佢?)佢身邊嘅女仔多過乜啦!(佢好多女友?)佢好專一!(呢輪對邊個專一?)私事要問番佢!」

唔恨嫁人

她又指不少讀書時的同學已嫁人,問到何時到她,她說:「我唔鍾意Plan未來,亦幻想唔到自己結婚會係點。(你會閃婚?)冇諗,我覺得依家同屋企人生活都好開心,開心就OK!」提到世界盃戰況,她說:「我本來睇好哥斯達黎加,覺得佢哋新崛起,依家出局,但已好好成績。至於阿根廷,因為我鍾意巴西,有兩支南美強隊入4強都幾好,最心痛係尼馬緣盡世界盃!」