張智霖的新MV邀得好友蔡一智、蘇志威及梁烈唯等大玩瘋狂Cosplay，更與三點式上陣的D Cup日模清穗久美子同車，艷福無邊！他笑言曾邀請太太袁詠儀（靚靚）探班，卻換來對方一句「冇眼睇」！

清穗久美子以比堅尼Look伴住Chilam拍MV，So Hot！

靚靚雖獲邀探班，但寧願唔去！

梳占士甸頭的Chilam出動香車，載埋美女清穗久美子。

蝙蝠俠Chilam和羅賓梁烈唯玩到碌地沙。

Chilam貼符和蔡一智扮殭屍，被蘇志威收服。

型男張智霖（Chilam）將於本月六日舉行演唱會，近日密密進行綵排，日前抽空為個唱主題曲《瘋狂有時》拍攝MV，因經理人公司老闆蕭定一拍慣3D電影，MV順勢大玩特技，時光倒流以80年代做背景，並碌盡人情卡，邀得多位好友蔡一智、蘇志威、梁烈唯、Bob（林盛斌）及BabyJohn（蔡瀚億），更獲Mandy Lieu師妹日模清穗久美子（Kumiko）三點式助陣，大玩角色扮演，配合個唱Crazy感覺！

Chilam先Gel行頭扮占士甸駕駛名車，接載穿泳衣的Kumiko出發游水，Kumiko大晒D Cup靚Body，香車配美人畫面香艷，Chilam直言兩人相當有緣，曾多次合作廣告，據知Kumiko更是其粉絲，將自掏腰包往睇騷，問到與索女如此親密，會否怕太太袁詠儀呷醋？Chilam笑說：「我有叫佢嚟探班，佢話冇眼睇我呀！」

爆肌追逐

MV中Chilam其後因被追捕，需不停變裝避難，如穿蝙蝠衣與扮演羅賓的梁烈唯惡鬥謎語人BabyJohn，蒙面的Chilam與唯唯大騷「腹肌」，造型Old School爆笑！另一幕Chilam與蔡一智扮中國古代殭屍，蘇志威（阿細）戴上眼鏡扮道士收服Chilam！問到最喜歡的造型，Chilam笑說：「最好玩係扮殭屍，我冇咩機會扮，過足戲癮！」

Chilam近年積極回歸樂壇，MV諗頭多多兼具話題性，早前請來女神陳法拉、謝安琪及黃美棋互動，其後邀得蔡一傑及伍詠薇性感肉搏！