樂印姊妹的駱胤樺最近撇甩妹妹駱胤鳴，趁暑假進軍教育界，為葉文輝（啤梨）的藝術學校執教鞭！校長啤梨為達成胤樺30歲前做媽咪的夢想，主動做媒人為她牽紅線，隨時展開一段教室浪漫史！

想在30歲前生小朋友的駱胤樺目前單身，希望她能在教室邂逅另一半啦！

獲啤梨賞識的駱胤樺暑假將執起教鞭，盡展所長！

啤梨笑言會幫口問男教師有冇樓「揸手」，積極為駱胤樺牽紅線。

駱胤樺（左）將撇甩妹妹駱胤鳴，在今個暑假擔任導師。

女子組合樂印姊妹的家姐駱胤樺愛心爆棚，曾修讀教育文憑的她本想進軍教育界培育英才，可是最後卻為音樂夢想選擇暫時放下教鞭。她在入行後被啤梨力邀為藝術學校擔任暑期班導師，教小學生英文音樂劇，令她再圓教育夢。

胤樺表示近日忙於為開班準備教材，在八月尾將會有畢業匯演檢閱小朋友的學習成果，她說：「我整咗好多動物手工，初步構思個畢業音樂劇會講十二生肖，希望上到台可以用得着。（粉墨登場？）我諗緊會唔會加入，但就算玩都只係做旁述。」她坦言校長啤梨隨時突擊監堂令她最感壓力，啤梨即時否認：「我會突擊監場，我都想做你學生聽書啫！講真，我見過唔同老師，但我覺得胤樺個樣會令小朋友一見鍾情，吸引到佢哋！」

熱愛小朋友的胤樺早已有當媽媽的計劃，但大前提是要儲夠錢買樓，為下一代提供安樂窩：「我覺得買咗樓、置咗業先可以生小朋友，目標係30歲前生，至少要生三個，但都要金錢上有能力先至得！」

情繫男教師

若想媽咪夢成真，當然要有真命天子配合，啤梨承諾會搭路為單身的胤樺擇偶：「我呢度好多男教師都冇拍拖，又鍾意小朋友，我可以幫手認真揀，首先我會問佢哋有冇樓先！」心繫阿Sir的胤樺直言會額外加分，因雙方喜歡小朋友會令將來家庭氣氛分外融洽。