江美儀在新劇中與黃智賢有一段內斂的感情線,為了做到首尾呼應的效果,她坦言主動加插一場接吻戲,不擔心被指私自加戲,笑言自己是集郵女星。

江美儀自誇「咀親個個都會紅」,不少男藝人都想同佢咀!

江美儀主動要求加插一場與黃智賢的咀戲。

江美儀

藝人江美儀在無綫新劇《點金勝手》中,飾演一名股市諮詢委員會主席,位高權重,同時與劇中對手黃智賢有一段比較內斂的感情線,為了令故事有首尾呼應的效果,她不避嫌主動要求加插一場接吻戲,她說:「劇中我要做主動角色,會成日捉住黃智賢咀,但每次佢都會推開我。有場喺婚姻登記處準備結婚嗰場咀戲,係我要求加落去嘅,因為想同劇尾有場接吻戲可以做到前呼後應嘅效果。(擔心被指公器私用?)唔怕!我擺明係集郵女星啦!同我咀親個個都會好紅o架!佢哋依家排隊收買監製、編劇要同我拍咀戲o架!」

做愛犬經理人

對於今次演出沒有「黑絲」誘惑,亦沒有和馬國明的激情場面,江美儀說:「今次未必咁有話題性咪好囉!大家可以注意我嘅演技,唔使再注意我對腳有冇着黑絲,其實之前都冇諗過觀眾可以對我有咁多想像空間,好多謝觀眾咁關注我,我唔介意嘅!」

除了江美儀的演技有目共睹外,連其愛犬Teddy都有客串幾集,她說:「佢演技直頭用精湛嚟形容,演得仲好過我,佢有幾場戲同黃智賢有眼神接觸,真係交到戲o架!(搶你鏡?)仲好,之後大家搵佢開工,我唔使做得咁辛苦,我要做寵物經理人。」她笑言Teddy首次演出便獲得大量品牌贊助:「佢有免費沖涼、梳毛後先出鏡,待遇好過我好多,我喺呢行做咗十幾年先有贊助。」