張智霖抓賣底褲賺肌金
下月初開騷的「美魔男」張智霖（Chilam）成功激減廿幾磅，操得一身「展覽級」靚肌，雖然昨日綵排時密實上陣，但爆肌早已獲垂青，不排除一次過拍內褲廣告兼出男神寫真，實行引死粉絲！
爆肌期
張智霖雖然以鬆身衫遮掩一身肌肉，但麒麟臂再現，令人期待個唱剝衫一刻！
排骨期
張智霖以往曾在個唱中騷肌，當時骨感較強，但腹肌依然強勁。
反胖期
拍攝《衝上雲霄II》時，張智霖曾當眾露豬腩肉。
張智霖與一班女Dancer排舞，圍着他貼身勁舞，小心老婆詐型！
現年42歲的Chilam為下月6至8日舉行的一連三日紅館騷《ChiLam Crazy Hours Live 2014》，不惜三個月前加入操肌行列，秘密操至Top弗狀態！不過，他昨午偕十名女舞蹈員進行綵排時，仍對「完全體」收收埋埋，刻意着鬆身T恤及長褲遮掩身材，但難掩尖尖的下巴，Chilam笑言已終極減磅，肌肉更達至「展覽」級別：「呢兩、三個月減咗廿幾磅，依家見得吓人。（到時騷肌？）梗係啦！唔騷出嚟點得！唔畀大家展覽吓都唔可以！」
打算出埋寫真
樂迷不僅能在個唱一睹Chilam的肌肉，稍後或可在內褲廣告再飽眼福，皆因身形弗爆的他已被內褲廣告商睇中，難怪他亦信心十足，絕不介意「巨鵰」內褲Look見街：「公司話有內褲廣告搵我，我覺得梗係OK啦！唔好嘥，一次過！」問到會否露股及全裸上陣，Chilam笑說：「唔一定全裸，總之要靚。」他還打算「食住上」出男神寫真：「不如拍埋寫真！留倩影，我唔知呢個身形可以Keep幾耐，要拍就快。」
不過，爆肌男神唔易Keep，Chilam縱然飲食節制，但身邊有眾多「魔鬼」，他埋怨說：「生活好自律！連波都唔睇，但都有偷食嘢，每次食完就同健身教練告解，最過分係好多朋友約我食嘢，尤其之前做完演唱會嘅朋友，好似蔡一智咁，所以想盡快開騷。」提到一身靚肌已達至「展覽級」，但Chilam卻自爆老婆袁詠儀（靚靚）仍未飽眼福及親自驗貨：「佢喺內地拍劇，平時有Send相畀佢睇，但真身就未睇過，所以特登操到展覽級畀佢睇！」他又笑言老婆返港冇得放肆：「佢返嚟香港，即係等於我嘅假期宣布結束，不過都好嘅，起到監察作用。」至於靚靚昨晚則在微博分享青島工作點滴，讚酒店員工細心。
