符致逸(Adrain)由白領變身歌手,由幕後走到幕前,後又因音樂而與歌神陳奕迅(Eason)結下不解緣,更獲對方義氣力撐擔任MV男主角。他坦言與Eason在音樂上有默契,希望將來可與他合唱。

符致逸(左)用刀「行」着Eason!大家勿誤會,這只是MV情節而已。

Eason大讚符致逸有才華。

符致逸願意放棄穩定的白領工作,做一個唱作人。

創作歌手符致逸這個名字對歌迷來說可能十分陌生,但他的作品卻曾被不少歌手演繹,包括Eason的《路…一直都在》、《我們都寂寞》及范瑋琪的《絕密》等。今年Adrain不只為他人作嫁衣裳,更決定走到幕前做歌手,推出個人唱片,「親口」演繹自己的作品:「我做音樂人做咗15、16年,幕後角色其實都好舒服,不過我都有玩Band,自己又開始唱多咗歌,唱唱吓都覺得OK。咁啱我幫林夕寫歌,公司聽到我幫佢寫嘅歌覺得有啲興趣,所以就幫我出碟。」

棄白領Sing夢高飛

Adrain表示是「兼職」做音樂,皆因他有一份白領工作,經常要為工作化身「空中飛人」:「因為我嗰間係美國公司,所以我朝早用Email同公司傾嘢,之後大半日就做音樂,返到屋企再處理公事。因為我管東南亞,所以成日飛,啲朋友成日問我Base喺邊,我講笑話Base喺飛機!」問到若要他在白領工作及音樂間二選一,他即毫不猶豫選擇音樂:「工永遠有得搵,但簽約做歌手嘅機會就只得一個,希望可以完成音樂夢,如果唔繼續做,我唔知自己極限喺邊,我唔會甘心。」

Adrain憑音樂與Eason結緣,早前Adrain拍攝新MV時更獲Eason驚喜撐場,他說:「我完全唔知,公司同監製幫我安排,Eason無啦啦Send短訊畀我話:『Hey,see you at the MV shoot。』我仲心諗咩MV,我真係冇乜嘢可以回報佢,咁多年用我啲歌,又幫我拍MV。(同佢合唱?)我都想,希望有一日可以一齊唱歌,因為我哋音樂上幾有默契!」