天王黎明愛簽新人，近年他羅致旗下的都被稱為「黎明愛將」，衞蘭、文詠珊、JW……年僅24歲的JW個子不高，跟師姐衞蘭一樣有點Baby Fat，是出名靚聲之人，她覺得做藝人最難的不是沒私隱沒空間，而是沒有「吃」的自由，如果不是為了唱歌，她鐵定是個快樂可愛的肥妹！

JW帶點可愛的Baby Fat，原來是嗜吃之故。

JW染了一頭黃髮，添了幾分「Rock妹」味道。

JW不但有開騷的夢，還想演喜劇做諧星！

JW因黎明發掘而入行，從此成為「黎明愛將」。

JW曾獲黎明出手拍MV，化身百變舞后。

JW在黎明的演唱會中落力演出。

樂基兒（右）與JW到荷里活星光大道跳扭腰舞。（黑白圖片）

五年前，十八歲的JW準備到英國倫敦讀大學，機緣巧合下跟黎明（Leon）見面，Leon二話不說便把她收歸旗下，當時JW還在讀書，歌手只是「兼職」，五年晃眼過去，今年24歲的她畢業後成為全職歌手：「我媽咪係菲律賓加西班牙人，所以我由細到大都係講英文同聽英文歌多，我好幸運，屋企人好支持我，其實我家姐都好鍾意唱歌，不過Daddy嗰陣未咁Open，所以最後家姐做咗律師（現時任職銀行），到我畢業，Daddy媽咪好支持我做歌手。」但喜歡唱歌未必不會發台瘟，JW回想第一次站在舞台上，怕得雙腳發抖，Leon於是說：「驚係幫唔到你，你愈驚，最後最冇得益嘅係你自己！」一席話令她開竅，從此享受台上的每一個時刻。

為黎明努力運動

JW稱公司給予很大的自由度，她亦敢於發表意見，幾乎每一個MV她都會加插構思：「我比較Casual，形象方面都係以簡單為主，之前Gaile（樂基兒）幫我做形象，依家就係好朋友馬天佑幫手，好似最近我想染頭髮，就漂晒一頭黃色，公司都冇乜所謂！」話雖如此，JW仍深明藝人的形象十分重要：「其實Leon從來一句都冇話過我肥，不過我唔高，所以一定唔可以肥，但我又好鍾意食嘢，惟有Keep住運動，又戒零食，呢樣先係最難，我可以肯定，如果唔係做歌手，我一定會變肥妹！但我唔介意，我不嬲都唔鍾意好瘦嘅女仔，從來唔希望自己好似一塊板，我有身材！哈哈哈……其實香港女仔都唔好太介意，成日話自己肥啦！我相信男仔都鍾意女仔有啲肉。」為配合娛樂圈一套所謂「標準」的身形，JW每天堅持做運動，有時會跑樓梯回十九樓的家，有時又會在家做掌上壓及Sit Up，亦會打網球，務求不增磅。

另類夢想做諧星

不經不覺入行已快六年，JW希望能在工作上有突破，但這「突破」卻頗出人意料，她笑說：「我諗每一個歌手終極目標都係開屬於自己嘅演唱會，當然我好想，亦都想試吓作曲寫詞，我好欣賞方大同，好羡慕佢可以做自己鍾意嘅音樂，而呢啲音樂又有知音人，有機會都好想同佢合作！另外，其實我好想演戲，最想演喜劇，我好鍾意吳君如，覺得佢做戲好放，做醜化角色我都唔介意，覺得自己都有搞笑天分！」很難想像JW會是喜劇演員，但現今大部分歌手都兼拍電影，加上老闆黎明轉做導演，JW的「夢想」理應不難實現！喜歡幽默，她甚至想交個搞笑男友：「我鍾意幽默嘅男仔，可以成日令我笑，我都鍾意高大嘅人，雖然我唔高，但感覺可以小鳥依人，一定唔可以瘦，因為我都唔鍾意自己太瘦，最好摸落去有啲肉！」

鑽研食譜賣大包

JW在英國留學時經常下廚醫肚，所以對煮食也有點研究，近日她埋首鑽研麵包蛋糕食譜，想放在朋友的餐廳內售賣，賺錢之餘又有滿足感。這個想法蠻新鮮，說不定可以另創一番事業呢！

後記：青春就是要坦率

跟JW做訪問，可以感受她可愛坦率的一面。現今的孩子一般都很成熟世故，甚至有點矯揉造作，不及JW的簡簡單單來得自然！畢竟人生路漫漫，總有一天，時間會令你變得「商業化」。青春，應該是這樣！