昨日凌晨的世界盃重頭戲碼,荷蘭以5:1反勝上屆盟主西班牙,令「牛迷」大跌眼鏡!

甚少睇波的汪明荃昨日在微博表示被賽果嚇窒:「沖完涼出來,比賽竟然是---西班牙1:5荷蘭!」而西班牙球迷高海寧則留言:「輸得咁難睇真係冇諗過......繼續支持,唔會淨係做勝利球迷!」另外,鄭丹瑞在微博笑言夢見「第一紙板鋼門」的稱號被西班牙門將卡斯拿斯奪走:「夢見迪保斯基(西班牙領隊)打電話給我,邀請我去代替卡斯拿斯!我問他:你知道我是誰嗎?他答:知!亞洲第一紙板鋼門嘛!我問你還夠膽請我?他說紙板鋼門稱號已被卡斯拿斯奪走!」

而荷蘭星級擁躉陳百祥則中了600倍波膽:「開波前有人同我拗,話西班牙會讓荷蘭2球,我話掉番轉就差唔多!波膽我都中埋,叫咗黃杏秀買荷蘭贏4:1、5:1同6:1!(600倍波膽好和味?)買10蚊啫!(仲有邊隊波夠荷蘭踢?)南美波巴西、阿根廷同烏拉圭,歐洲冠軍西班牙都搞成咁,其他唔夠踢啦!(同曾志偉、譚詠麟賭牙骹?)業餘同職業好難比喎!佢哋踢波同賭波都係業餘!」

此外,無綫昨晚的《2014FIFA巴西世界盃:森巴速遞》,有讀者投訴播錯片段,節目監製李漢源坦言原本前晚已抽起該片段,不知為何昨晚會播出,會再了解情況。