草蜢前晚結束尾場紅館演唱會,三子將全場氣氛由頭帶到落尾之餘,容祖兒更於台上與蔡一傑「咀嘴」,蔡一智取笑祖兒男友劉浩龍會呷醋,傑仔更自爆「愛人」在場不能激吻!

祖兒當眾與蔡一傑咀嘴,唔怕激嬲劉浩龍?

鄭伊健(中)與草蜢在台上邊唱邊影相。

未知是否因為張耀揚(右一)在場,令蔡一傑唔敢「行差踏錯」呢?

蔡一傑雖攬實祖兒,但他自爆「愛人」有到場唔敢亂嚟。

草蜢一共六場的《BE THREE演唱會》前晚圓滿落幕,好友周柏豪、梁烈唯、張智霖、蒙嘉慧、林海峰及彭羚等捧場,並請來容祖兒及鄭伊健擔任嘉賓。以全綠裝扮登場的祖兒自爆小時候最鍾意蘇志威(阿細):「細個成日發夢見到阿細,終於夢想成真!」隨後她與蔡一傑合唱《愛一次便夠》,期間細心的傑仔為祖兒重新戴上鬆脫的耳機,二人在台上親密地攬腰、十指緊扣及面貼面,最後祖兒更不怕男友劉浩龍呷醋與蔡一傑「咀嘴」!

最愛是誰?

慶功宴上,傑仔指很久沒跟祖兒合作:「有一段時間冇合唱,啱啱情深款款咁互望!(咀嘴係即興?)Mood到。(怕唔怕劉生嬲?)Friend Kiss!」在旁的阿智插嘴:「又唔係French Kiss!」傑仔聞言自爆:「我愛人有嚟支持唔可以激吻。」而曾與傑仔傳緋聞的同性密友張耀揚有現身後台,令「愛人」一詞更增添遐想!

早前猝死的張耀榮是今次草蜢演唱會的出品人,同時耀榮娛樂亦是主辦單位之一,慶功宴上未有代表出席,草蜢經理人林珊珊說:「張太(元配羅桂珠)綵排同拜神有嚟,佢有同草蜢講有事,太夜唔嚟慶功。」而日前傳出兩房不和一事後,爆出清盤及賣盤消息,張耀榮長房長子張永康昨日突然自爆:「傳啫,好多誤會。」而祖兒昨午出席無綫舉行的《勁歌金曲優秀選第一回》綵排,其後因身體不適缺席晚上的頒獎禮,記者致電英皇求證,發言人說:「祖兒綵排時已經唔舒服,去睇醫生後證實係急性腸胃炎,依家留喺屋企休息。」