無綫昨日下午派出朱千雪、陳庭欣、陸浩明、楊潮凱聯同球星山度士等到尖沙咀五支旗杆向市民免費派世界盃特刊《世盃Non Stop》，吸引數百名市民爭相取閱，不到半小時已被搶光。朱千雪與陳庭欣兩位索女最受歡迎，除了吸引本港市民，連老外遊客及內地旅客也為之瘋狂，有孭着背囊的老外遊客向朱千雪埋首攞特刊，又撩朱千雪傾談及拍照留念，而陳庭欣則被霸氣內地師奶遊客伸手搶特刊。

師奶遊客伸手向陳庭欣索特刊。

老外遊客黐住朱千雪又攞特刊又傾偈及影相。

陸冠邦、楊潮凱、朱千雪、陳庭欣、陸浩明、山度士及潘耀焯到尖沙咀派書。

朱千雪表示睇好巴西捧盃：「巴西有主場之利，但係唔知到時瞓完起身睇抑或睇完再瞓！」講到苟芸慧在巴西險被球迷「狼吻」，她說：「喺香港畀人強吻會好突然，但去到巴西氣氛咁熱情，可能唔覺得係一回事。」陳庭欣則因情意結而支持英格蘭，又大讚《世盃Non Stop》夠輕便，連女士都可以好方便攞出街。

陸浩明讚特刊易收藏

陸浩明與楊潮凱大受師奶歡迎，陸浩明說：「以為男仔先會攞，點知太太同小朋友都嚟攞，連外國人都攞埋一份，本特刊細細本易收藏！」身為荷蘭擁躉的他希望愛隊擺脫二奶命捧盃。而為無綫網絡電視19台主持節目《低俗講波團》的他表示幾乎會睇盡64場球賽，屆時準備調整生理時鐘，下午睡覺，深夜才有精神講波。講到苟芸慧在險遭「狼吻」，他笑言未試過被女仔索吻，若遇到男士埋身，會選擇反客為主。而楊潮凱派《世盃Non Stop》時則搞笑地向途人介紹封面上的千雪，向市民稱千雪真人靚過上鏡，吸引市民圍觀。