何傲兒 馬賽熱捧世盃掀搶書潮
全球體育盛事世界盃今日在巴西正式開鑼！東方報業集團強勢呈獻世盃特刊《世盃Non Stop》，昨午邀得何傲兒、馬賽、朱千雪及陳庭欣等當紅無綫藝人在銅鑼灣和尖沙咀派發，引得大批市民及遊客反轉鬧市爭相「奪寶」，搞到大會出動多名保安護花，猶如把巴西搬到現場！
羅孝勇（左起）、楊潮凱、何傲兒、黃興桂及馬賽闖銅鑼灣鬧市派特刊，吸引大批人圍觀兼攞書。
男途人向馬賽攞完書再攞合照，一舉兩得，保安人員在旁「人盯人」護駕。
何傲兒派特刊，連小朋友都爭住攞！
馬賽等被大批人團團圍住等攞書，大受歡迎。
《世盃Non Stop》內容精彩，令球迷愛不釋手。
萬千球迷等足四年的球壇盛事世界盃今日終於在巴西開鑼，掀起各地球迷高漲情緒！適逢東方報業集團斥資呈獻的世盃特刊《世盃Non Stop》率先出版，邀得馬賽、何傲兒、羅孝勇、楊潮凱等當紅無綫花旦小生及足球評述員黃興桂於昨午五時出巡，在銅鑼灣鬧市派發特刊，吸引數百名市民及世界各地遊客爭相圍觀兼「奪寶」，雖然無綫出動八名保安以「人盯人」防守戰術護駕，但始終攔不住球迷的熱情，不少人要書又要人，攞完書順便索合照，場面哄動得簡直將巴西搬到現場！
最受歡迎的風頭躉，非何傲兒及馬賽兩女莫屬，一眾「龍友」聞風而至攝位等派書，令馬賽興奮大讚場面熱鬧：「我好少喺銅鑼灣派嘢，市民好有興趣攞特刊！好熱情！」她又大讚《世盃Non Stop》資訊齊備：「我冇時間上網搵賽程，打開本書齊晒每場波幾時舉行，非常清晰！」
大人細路都Buy
而何傲兒透露大人細路都勁Buy特刊，她說：「好大疊特刊好快就派晒，差啲派唔切，小朋友都過嚟攞！可能佢哋知爸爸鍾意睇波，攞畀爸爸睇！」講到今年的世界盃，力捧有主場之利巴西的她，大讚隊中球星尼馬無論腳法、扭波或射波都冇得彈，今年好大機會捧盃。
至於羅孝勇亦不甘示弱，他笑言自己喪吸女士埋身：「梗係女仔受歡迎啲，不過我都專攻派畀女仔，一本都冇畀人拒絕過！」
楊潮凱連踩兩場
連走兩場的楊潮凱不忘與球迷講波經，激讚眾人反應好：「嘩！好多人爭住拎，本來手上勁大疊，但已經極速派晒！同埋本特刊賽程勁齊勁易睇，有咗佢唔驚Miss任何一場賽事啦！」問到兩人對世界盃奪冠的心水？支持澳洲的羅孝勇期望隊伍可以走得更遠，而比較「花心」的楊潮凱則情傾韓國，但認為阿根廷亦大有機會勝出。
