吳浩康撇甩女友船P出「手」

吳浩康（Deep）自與師妹鍾舒漫（Sherman）拍拖後變得修心養性，但昨日有讀者向本報爆料及提供一張Deep在船P手搭少女膊頭的「肉」照，暗指他溝女！Deep昨日在電話中表示當日是應表哥邀請，船上很多人他都不認識：「人哋有禮貌叫我合照，冇理由此地無銀唔影，好似不近人情！」他直斥被人爆料一事很討厭：「好無聊！（避忌啲？）呢啲邊有得避？（Sherman知你去船P？）知，佢好清楚我行蹤，我最介意影到我肚腩好肥。」而Sherman亦在電話向男友投信任票，怕曬的她當日跟妹妹去睇舞台劇，笑言「下次我死都跟埋去」！又擔心影響男友形象：「作為藝人，有呢啲類似嘅相漏出去，始終擔心會影響形象！（可能佢前科唔好！）我理解，但冇理由成日講番以前啲嘢，咁對佢唔公平！」